Sat, Apr 10, 2021 20:48




पुणे : बनावट ठेव पावत्या सादर करुन मिलटरी फार्मसची ३८ लाख ८८ हजार रुपयांची फसवणूक

Last Updated: Apr 08 2021 3:14PM

संग्रहित छायाचित्र




पुणे : पुढारी वृत्तसेवा

अन्नधान्य पुरविण्याचा ठेका घेताना बनावट नुतनीकरण ठेव पावती व फिड पुरवठा करावयाचे हप्ते पावत्या सादर करुन दोघा ठेकेदारांनी मिलटरी फार्मसची तब्बल ३८ लाख ८८ हजार ५०० रुपयांची फसवणूक केल्याचा प्रकार समोर आला आहे. याप्रकरणी, हैद्राबाद येथील ठेकेदार धर्मा देवी (आंध्रा सेल्स कॉर्पोरेशन रा. हैदराबाद) आणि मनोज अगरवाल (बालाजी कॉर्पोरेशन रा. मलाकपेठ, हैदराबाद) यांच्याविरुद्ध कोरेगाव पार्क पोलिस ठाण्यात  गुन्हा दाखल करण्यात आला आहे. 

अधिक वाचा : भाजपला धक्का; पश्चिम महाराष्ट्र देवस्थान समिती बरखास्त

याबाबत ले. कर्नल अविनाश शर्मा (वय ५०, रा. फार्म हाऊस मिलिटरी, सिकंदराबाद) यांनी फिर्याद दिली आहे. हा प्रकार सदर्न कमांड मुख्यालयातील मिलटरी फार्मस येथे २९ जून २०१२, २ जुलै २०१३ आणि २७ जानेवारी २०१४ यावेळी घडला आहे. 

पोलिसांनी दिलेल्या माहितीनुसार, मिलटरी फार्मस यांना अन्नधान्य पुरवठा करण्यासाठी सदर्न कमांडमधील मिलटरी फार्मस यांनी निविदा काढल्या होत्या. त्यात या दोघांनी भाग घेतला. त्या प्रक्रियेत या दोन्ही फर्मनी ३८ लाख ८८ हजार ५०० रुपयांची नुतनीकरण ठेव पावत्या व फिड पुरवठा करावयाचे हप्ते पावत्या सादर केला. त्यानुसार त्यांना अन्नधान्य पुरवठा करायचा ठेका मिळाला व त्यांनी कामकाज सुरु केले. 

अधिक वाचा : मुख्यमंत्री उद्धव ठाकरेंनी घेतला कोरोनावरील लसीचा दुसरा डोस 

त्यानंतर या दोन्ही फर्मनी दिलेल्या सुरक्षा ठेव पावत्यांची लेफ्टनंट कर्नल शर्मा यांनी हैदराबाद येथील स्टेट बँक ऑफ इंडिया यांच्याकडे शहानिशा केली. तेव्हा बँकेने अशा प्रकारच्या पूर्वी नुतनीकरणाच्या कोणत्याही ठेवी न ठेवण्याबाबतची माहिती दिली. या दोन्ही संस्थांनी वैयक्तिक आर्थिक फायद्यासाठी बनावट पावत्या तयार करुन त्या खर्‍या असल्याचे भासवून त्या सदर्न कमांड कार्यालयात सादर करुन लष्कराची ३८ लाख ८८ हजार ५०० रुपयांची फसवणूक केली. कोविड -१९ मुळे तक्रार देण्यास उशीर झाल्याने फिर्यादीत म्हटले आहे. पुढील तपास पोलिस उपनिरीक्षक रुपेश चाळके करीत आहेत.