Tue, Aug 04, 2020 14:05



होमपेज › Mumbai-Thane-Raigad › राज्यात पोलिस शिपायांच्या १० हजार जागा भरणार : अजित पवार

राज्यात पोलिस शिपायांच्या १० हजार जागा भरणार : अजित पवार

Last Updated: Jul 07 2020 8:46PM




मुंबई : पुढारी वृत्तसेवा

राज्यातील कायदा-सुव्यवस्था भक्‍कम करण्याबरोबरच पोलिस दलावरील कामाचा ताण कमी करण्यासाठी राज्यातील पोलिस शिपाई संवर्गात दहा हजार तरुणांची भरती करण्याचा निर्णय घेतला आहे. याचा फायदा शहरी व ग्रामीण तरुणांना होईल, अशी माहिती उपमुख्यमंत्री अजित पवार यांनी मंगळवारी दिली.

नागपूर जिल्ह्यातील काटोल येथे राज्य राखीव पोलिस दलाच्या महिला बटालियनची स्थापना करण्याचा निर्णय घेल्याचेही उपमुख्यमंत्र्यांनी सांगितले.

उपमुख्यमंत्री पवार यांच्या अध्यक्षतेखाली मंत्रालयातील त्यांच्या दालनात बैठक झाली. बैठकीला गृहमंत्री अनिल देशमुख यांच्यासह गृह विभागाचे अतिरिक्‍त मुख्य सचिव सीताराम कुंटे, वित्त विभागाचे अतिरिक्‍त मुख्य सचिव मनोज सौनिक, गृह विभागाचे विशेष प्रधान सचिव अमिताभ गुप्‍ता, महसूल विभागाचे अतिरिक्‍त मुख्य सचिव नितीन करीर, पोलिस महासंचालक सुबोध जयस्वाल, माहिती व तंत्रज्ञान विभागाचे प्रधान सचिव एस. श्रीनिवास, एसआरपीएफच्या अप्पर पोलिस महासंचालक अर्चना त्यागी आदी उपस्थित होते. 

बैठकीत गृह विभागाकडून पोलिस शिपाई पदाच्या 8 हजार जागा भरण्याचा प्रस्ताव मांडला होता. परंतु, उपमुख्यमंत्री पवार यांनी त्यात आणखी 2 हजार जागा वाढवून एकूण 10 हजार पोलिस शिपाई भरती करण्याचे व ही भरती प्रक्रिया येत्या वर्षभरात पूर्ण करण्याचे निर्देश दिले. कोरोना संकटाच्या पार्श्‍वभूमीवर ही भरती प्रक्रिया विनाअडथळा यशस्वीपणे कशी राबविता येईल, याचा विचार करून सर्वंकष प्रस्ताव मंत्रिमंडळ बैठकीत तातडीने मांडण्याचे निर्देशही उपमुख्यमंत्र्यांनी दिले. मंत्रिमंडळाच्या मंजुरीनंतर भरती प्रक्रियेची कार्यवाही वेग घेईल, असा विश्‍वासही  पवार यांनी व्यक्‍त केला.

महिला बटालियनमध्ये 1,384 पदे निर्माण करणार

नागपूर जिल्ह्यातील काटोल येथे राज्य राखीव पोलिस दलाची महिला बटालियन स्थापन करण्याच्या निर्णयावरही उपमुख्यमंत्र्यांच्या अध्यक्षतेखालील बैठकीत शिक्‍कामोर्तब झाले. या बटालियनसाठी 1,384 पदे निर्माण करण्यात येणार असून, प्रत्येक टप्प्यात 461 प्रमाणे 3 टप्प्यांत ही पदे भरण्यात येणार आहेत. यातूनही शहरी व ग्रामीण युवतींना पोलिस सेवेची संधी मिळणार आहे.

राज्यातील सण, उत्सव, सामाजिक-राजकीय मोर्चांमध्ये महिलांची लक्षणीय संख्या लक्षात घेऊन कायदा-सुव्यवस्था मजबूत करण्यासाठी ही बटालियन स्थापन करण्यात येणार आहे. उपराजधानी नागपूरची भौगोलिक स्थिती, रेल्वे, विमान व दळणवळणाच्या साधनांची उपलब्धता लक्षात घेऊन एसआरपीएफच्या या केंद्रासाठी नागपूर जिल्ह्याची शिफारस केली होती. त्याअनुषंगाने काटोल गावाच्या हद्दीत शासकीय जमीन उपलब्ध असल्याने तिथे ही बटालियन स्थापन करण्यात येणार आहे. या निर्णयामुळे राज्यातील  पोलिसांवरील ताण कमी होण्यास, कायदा-सुव्यवस्था अधिक भक्‍कम होण्यास मदत होईल, असा विश्‍वासही उपमुख्यमंत्री पवार यांनी व्यक्‍त केला.