Sat, Dec 14, 2019 07:15



होमपेज › Arthabhan › अर्थवार्ता

अर्थवार्ता

Last Updated: Dec 08 2019 8:13PM




प्रीतम मांडके

गतसप्‍ताहात निफ्टी व सेन्सेक्स निर्देशांकाने 134.55 आणि 348.66 अंकांची घसरण दर्शवून 11921.5 व 40445.15 अंकाच्या पातळीवर बंदभाव दिला. निफ्टी व सेन्सेक्स निर्देशांकात अनुक्रमे 1.12 टक्के व 0.85 टक्क्यांची घसरण नोंदवली गेली.

मागील सप्‍ताहात झालेल्या रिझर्व्ह बँकेच्या पतधोरण आढावा बैठकीत देशातील व्याजदर जैसे थे ठेवण्याचा निर्णय झाला. या निर्णयान्वये रेपो रेटचा दर 5.15 टक्के तसेच रिव्हर्स रेपो रेटचा दर 4.90 टक्क्यांवर कायम रहाणार. चालू आर्थिक वर्षासाठी सकल राष्ट्रीय उत्पादन वाढीचा दर (ग्रॉस डोमेस्टीक प्रॉडक्शन) 6.1 टक्क्यांवरून 5 टक्क्यांपर्यंत खाली येण्याचा अंदाज रिझर्व्ह बँकेने वर्तवला. यापूर्वी जुलै ते सप्टेंबर महिन्यात जीडीपी दराने 4.5 टक्क्यांचा तळ गाठला होता. तसेच आर्थिक वर्ष 2020च्या दुसर्‍या सहामाहीत महागाईदरदेखील वाढून 4.7 टक्के ते 5.1 टक्के इतका असण्याची शक्यता रिझर्व्ह बँकेकडून वर्तवण्यात आली होती. यापूर्वी महागाईदर 3.5 टक्के ते 3.7 टक्के असण्याचा अंदाज वर्तवण्यात आला होता.

एचडीएफसी म्युच्युअल फंडमधील स्टँडर्ड लाईफ स्वतःचा 2.23 टक्के हिस्सा ‘हिस्सा ओएफएस’च्या माध्यमातून विकला. 3170 प्रतिसमभागच्या दरावर विक्री करण्यात आली. सुमारे 47.5 लाखांच्या समभागांची विक्री झाली. या विक्रीद्वारे 16 हजार कोटींचा निधी उभा करण्यात आला. सप्टेंबर 2019च्या आकडेवारीनुसार एचडीएफसी म्युच्युअल फंडात स्टँडर्ड लाईफचा 29.94 टक्के हिस्सा होता.

सुप्रिम कोर्टाच्या निर्णयान्वये व्होडाफोन आयडिया कंपनीची पूर्वलक्षी प्रभावाने करआकारणीनुसार 53038 कोटींची देणी सरकारजमा करणे अपेक्षित. अद्याप सरकारकडून या प्रकरणी कोणताही दिलासा दूरसंचार कंपन्यांना देण्यात आलेला नाही. दिलासा न मिळाल्यास व्होडाफोन आयडिया कंपनी बंद करण्याशिवाय पर्याय नसल्याचे धक्‍कादायक विधान आदित्य बिर्ला समूहाचे प्रमुख ‘कुमारमंगलम बिर्ला’ यांनी केले.

गूगलची प्रमुख कंपनी (पॅरेंट कंपनी) असलेल्या ‘अल्फाबेट’च्या प्रमुखपदी भारतीय वंशाच्या सुंदर पिचाई यांची निवड. अ‍ॅपल, मायक्रोसॉफ्ट यानंतरची अल्फाबेट ही जगातील सर्वात मोठी तिसर्‍या क्रमांकाची कंपनी. अल्फाबेटचे सध्याचे बाजारमूल्य 893.3 अब्ज डॉलर्सच्या जवळपास.

भारती एअरटेलच्या संचालक मंडळाने 4 अब्ज डॉलर्सच्या निधी उभारणीच्या प्रस्तावास मान्यता दिली. हा निधी समभाग, क्यूआयपी, परकीय कर्जे तसेच रोख्यांच्या स्वरूपात उभा केला जाणार. पूर्वलक्षी प्रभावाने आकारण्यात आलेल्या ‘एजीआर ड्यूज’ कराची परतफेड करण्यासाठी हा निधी वापरण्यात येणार. सुमारे 35500 कोटींचे देणे अद्यापही बाकी असल्याने एअरटेलतर्फे ही उपाययोजना करण्यात आली. 

युटीआय म्युच्युअल फंडातील हिस्सा 10 टक्क्यांच्या खाली आणण्याचे निर्देश सेबीमार्फत एलआयसी, एसबीआय तसेच बँक ऑफ बडोदा यांना देण्यात आले. यासाठी 31 डिसेंबर 2020 पूर्वी युटीआयच्या म्युच्युअल  फंड कंपनीतून तसेच युटीआयच्या ट्रस्टी पदावरून पायउतार होण्याचे आदेशदेखील या तीन सरकारी आस्थापनांना देण्यात आले.

1 जानेवारी ते 21 नोव्हेंबर दरम्यान बनवलेल्या 62 हजार गाड्या परत मागवल्या. सियाझ, इर्टीगा तसेच एक्सएल 6 यांच्यामधील सदोष यंत्रणेमुळे कंपनीकडून गाड्या परत मागवण्यात आल्याचे  कंपनीने स्पष्ट केले. 

कार्व्ही स्टॉक ब्रोकिंगमार्फत  2300 कोटींचे गुंतवणूकदारांचे समभाग गहाण ठेवण्याविरुद्ध सेबीने कडक कारवाई केली. गहाण ठेवण्यात आलेल्या समभागांपैकी 2013.77 कोटींचे मूल्य असणारे समभाग 82559 गुंतवणूकदारांना परत करण्यात आले. या प्रकरणी सेबीने हस्तक्षेप करून कठोर पावले उचलल्याने बाधित 87 टक्के गुंतवणूकदारांना दिलासा मिळाला. त्याचप्रमाणे कार्व्ही फिनटेक ही म्युच्युअल फंड सेवा पुरवणारी संपूर्णपणे भिन्‍न संस्था असून त्याचा कार्व्ही स्टॉक ब्रोकिंगच्या गैरव्यवहाराशी कोणताही संबंध नसल्याचे स्पष्ट करण्यात आले. कार्व्ही फिनटेक ही रजिस्टार अँड ट्रान्सफर एजन्सी असून एलआयसी, अ‍ॅक्सिस, निप्पॉन, टाटा यांसारख्या म्युच्युअल फंडांना सेवा पुरवते. गुंतवणूकदाराचे पैसे हे संबंधित म्युच्युअल फंड (एएमसी) कडे थेट जमा केले जातात. कार्व्ही फिनटेकचे प्रवर्तक ही अमेरिकेची ‘जनरल अ‍ॅटलांटिक’ कंपनी असून त्यांचा कार्व्ही फिनटेकमध्ये 83.25 टक्के हिस्सा आहे. केवळ नामसाधर्म्यामुळे कार्व्ही फिनटेकच्या म्युच्युअल फंडधारकांनी गोंधळून जाण्याचे कारण नसल्याचे कंपनीकडून स्पष्ट करण्यात आले.
29 नोव्हेंबर रोजी संपलेल्या सप्‍ताहात भारताची परकीय गंगाजळी 2.484 अब्ज डॉलर्सनी वधारून 451.08 अब्ज डॉलर्स झाली.
(मांडके फिनकॉर्प)