Wed, Sep 19, 2018 13:23



होमपेज › Vidarbha › ‘भाजप वेगळ्या विदर्भासाठी सकारात्मक’

‘भाजप वेगळ्या विदर्भासाठी सकारात्मक’

Published On: Feb 18 2018 7:38AM | Last Updated: Feb 18 2018 7:38AM



नागपूर : प्रतिनिधी

भुवनेश्वर येथे भाजपच्या कार्यकारिणीसाठी झालेल्या अधिवेशनात वेगळ्या विदर्भाचा ठराव करण्यात आला होता. भाजप वेगळ्या विदर्भासाठी सकारात्मक आहे. विधिमंडळात भाजपला बहुमत मिळाल्यानंतर वेगळ्या विदर्भाचा निर्णय घेऊ, असे वक्तव्य राज्याचे अर्थमंत्री सुधीर मुनगंटीवार यांनी केले.

 विभागीय आयुक्त कार्यालयातील सभागृहात अर्थमंत्री सुधीर मुनगंटीवार यांच्या अध्यक्षतेखाली जिल्हा वार्षिक योजनेची बैठक घेण्यात आली. बैठकीनंतर आयोजित पत्रकारपरिषदेत मुनगंटीवार यांनी विदर्भाच्या मुद्द्यावर भाजप सकारात्मक असून अटलबिहारी वाजपेयी पंतप्रधान असताना त्यांना विदर्भाचे शिष्टमंडळ भेटले होते. स्वतंत्र विदर्भाचा ठराव करण्यासाठी सध्या विधिमंडळात भाजपचे बहुमत नाही. तेलंगणा राज्य निर्मिती करताना विधानसभेत ठराव करण्यात आला होता. त्यामुळे विदर्भासाठीही असा ठराव करावा लागेल, असे मुनगंटीवार म्हणाले. 

 भाजपतर्फे सातत्याने छोट्या राज्यांचे समर्थन केले जात आहे. लोकसभा निवडणुकीत आम्हीच विदर्भ राज्याची निर्मिती करू, असे आश्वासन भाजपच्या नेत्यांनी दिले होते. भाजपचे नेते वारंवार भुवनेश्वर येथील राष्ट्रीय अधिवेशनात केलेल्या ठरावाचे दाखले देतात. केंद्रीय मंत्री नितीन गडकरी आणि मुख्यमंत्री देवेंद्र फडणवीस आम्ही विदर्भाच्या निर्मितीसाठी कटिबद्ध असल्याचे सांगतात. केंद्रात सत्ता आल्यानंतर वाजपेयी सरकारने हिंदी भाषकांची तीन राज्ये निर्माण केली. मात्र, विदर्भ राज्य केले नाही. 

लोकसभा निवडणुकीत विदर्भ होणार, असे गोड आश्वासन देण्यात आले होते. विदर्भात पंतप्रधान मोदी यांनी सभा घेतल्यानंतर विदर्भ राज्याचा साधा उल्लेखही केला नसल्याने भाजपला विदर्भ द्यायचा नाही असा रोष विदर्भातील नागरिकांकडून व्यक्त झाला. आता पुन्हा निवडणुका तोंडावर असताना मुनगंटीवार यांनी बहुमत मिळाल्यास वेगळ्या विदर्भाचा निर्णय घेऊ असे विधान केले आहे. याबद्दल तीव्र नाराजी व्यक्त होत आहे.