Fri, Apr 26, 2019 09:59



होमपेज › Solapur › मंगळवारच्या मनपा सभेत 90 दिवस पूर्ण होणारे विषय

मंगळवारच्या मनपा सभेत 90 दिवस पूर्ण होणारे विषय

Published On: Dec 05 2018 1:16AM | Last Updated: Dec 05 2018 12:56AM



सोलापूर : प्रतिनिधी

नगरसचिव खात्याकडे आलेले येत्या 16 डिसेंबरपर्यंत 90 दिवसांची मुदत संपणारे विषय मंगळवार, 11 डिसेंबरच्या मनपा सर्वसाधारण सभा विषयपत्रिकेवर घेण्यात आले आहेत. यापूर्वी अनेकांनी सभा तहकुबीसाठी विनंती केल्यामुळेच सभा तहकूब केल्याने यापुढे सभा तहकूब करण्यासंदर्भात संबंधितांची लेखी पत्र  महापौर घेणार आहेत. त्यामुळे सभा तहकूब आणि विषय परत जाण्याचे नाहक आरोप होऊ नयेत यासाठी महापौर ही काळजी घेणार आहेत. सर्व विषय संपेपर्यंत सभा चालविण्याचाही निर्धार महापौरांनी केला आहे.
मंगळवारी आयोजित सर्वसाधारण सभेच्या विषयपत्रिकेवर प्रशासनाचे 18, तर सभासदांचे दोन प्रस्ताव घेण्यात  आले आहेत. जलवाहिनी टाकणे, काँक्रिटीकरण, फरशीकरण, ड्रेनेजलाईन टाकणे आदी विषय आहेत. रस्त्यावरील पथदिवे दुरुस्तीसाठी आवश्यक साहित्य 67-3 क नुसार खरेदी करण्याचा विषय आहे. परंतु एलईडी मक्‍ता मार्ग मोकळा झाल्याने या विषयाला विरोधी पक्ष विरोध करणार असल्याचे संकेत आहेत.

पंतप्रधान आवासचे 1 कोटी अनुदान वाटप 7 डिसेंबरला
प्रधानमंत्री आवास योजनेतील घटक चारच्या म्हणजे स्वतःच्या जागेवर घर बांधणार्‍यांना शासनाचे प्रत्येकी 40 हजारांचे अनुदान वाटप 7 डिसेंबरला महापालिकेत घेणार असल्याचे महापौर शोभा बनशेट्टी यांनी सांगितले. एकूण 362 लाभार्थी असून यापैकी 59 लाभार्थ्यांना प्रत्येकी 40 हजारांचे अनुदान वाटप होणार आहे.

दिव्यांगांंना ताटकळत ठेवल्याने महापौर भडकल्या
3  डिसेंबर अपंगदिनी महापालिकेत कार्यक्रमासाठी आलेल्या दिव्यांगांना वरच्या मजल्यावरील सभागृहात जाण्यासाठी रॅम्प नसल्याने सभागृहाच्या खालीच ताटकळत राहावे  लागले होते. हे वृत्त दै. ‘पुढारी’ने प्रसिध्द केले होते. या वृत्ताची दखल घेत महापौर बनशेट्टी यांनी कामगार कल्याण अधिकारी यांना समजपत्र देण्याचा आदेश दिला. दिव्यांगांचा कार्यक्रम घेताना यापुढे पुरेशी काळजी घेण्याच्या सूचनाही महापौरांनी दिल्या.

स्मार्ट सिटीची आढावा बैठक पार
पालिका आयुक्‍त डॉ. अविनाश ढाकणे यांनी स्मार्ट सिटी अंतर्गत सुरु असलेल्या कामांची आढावा बैठक मंगळवारी घेतली. यात्रेपूर्वी स्मार्ट रस्ता एक बाजू काम पूर्ण करणे, होम मैदानचे काम पूर्ण करण्याचे निश्‍चित झाले आहे. स्मार्ट सिटीची सर्व कामे प्रगतीपथावर सुरु असल्याचे आयुक्‍तांनी सांगितले. 

एमआयडीसी समस्यांसंदर्भात बैठक
 एमआयडीसी असोसिएशनची बैठक आ. प्रणिती शिंदे यांच्या उपस्थितीत आयुक्‍तांच्या दालनात पार पडली. यावेळी एमआयडीसीतील समस्या सोडविण्याबाबत चर्चा झाल्याचे आयुक्‍तांनी सांगितले. यावेळी पेंटप्पा गड्डम, राजू राठी, रमेश ढाकलिया, राजेश शहा उपस्थित होते.

गोवर-रुबेला लस घेण्याचे आयुक्‍तांचे आवाहन
शहरात सध्या 9 महिने ते 15 वयोगटातील लहान मुलांना गोवर-रुबेला लसीकरण मोहीम सुरु असून ही लस सर्वांनी घेणे बंधनकारक आहे. ही लस घेण्यामुळे कोणताही त्रास होत नाही. लस घेताना उपाशीपोटी न राहता जेवण करावे, असे आयुक्‍त डॉ. ढाकणे यांनी सांगितले. मंगळवारी आयुक्‍तांनी मुस्लिम समाजातील मान्यवरांची बैठक घेत लसीकरणास प्रोत्साहन देण्याचे आवाहन केले. 30 ते 40 शाळांमध्ये कमी प्रतिसाद असून बाकी सर्वत्र लसीकरणाला मोठा प्रतिसाद असल्याचे आयुक्‍तांनी सांगितले. यावेळी माजी महापौर अरिफ शेख, मोहमद जहूरकर, मौलाना शेख, युनूस देगावकर, हुसेन शेख,  मिस्कीन शेख, ताहेर मोहम्मद यांच्यासह आरोग्य अधिकारी डॉ. संतोश नवले, प्रशासनाधिकारी सुधा साळुंखे आदी उपस्थित होते. यावेळी उपस्थितांनी लसीकरणाला प्रतिसाद देण्याचे आवाहन उर्दू शाळांना केले.

आरोग्य विभागातील गैरप्रकारात ‘दाल मे कुछ काला’
महापालिका आरोग्य विभागातील तत्कालीन वैद्यकीय अधिकारी डॉ. ज्योत्न्सा कोरे, डॉ. शिरशेट्टी यांनी राष्ट्रीय नागरी आरोग्य अभियानांतर्गत महापालिकेस दिलेल्या निधीत गैरव्यवहारासंदर्भातील तक्रारींची दखल घेत शासनाने यांच्याकडून रक्‍कम वसूल करण्याचे आदेश दिले आहेत. यासंदर्भात त्रिसदस्यीय समितीने दिलेल्या आवाहालानुसार कारवाईचे आदेश दिले होते. अनुपालन अहवाल 15 दिवसांत द्यावा, असे आदेश 24 आक्टोबरला आरोग्य अधिकारी यांना देण्यात आले होते. परंतु हा अनुपालन अहवाल दिला की नाही, यामागे काय, ही शंका उपस्थित होते आहे.

उपमहापौर, पक्षनेता कार्यालय नूतनीकरणावर 25 लाख खर्च
उपमहापौर व पक्षनेता यांच्या कार्यालयाचे नूतनीकरण करण्यात आले असून वाढीव काम करण्यासंदर्भात उपमहापौर व पक्षनेता यांनी वेळोवेळी पत्रान्वये आदेश दिलेले आहेत. त्यामुळे पूर्वगणनपत्रकात वाढ झाली आहे. मुख्य लेखापरीक्षक यांच्या प्रस्तावानुसार नगरअभियंता यांचा खुलासा प्राप्‍त करून घेऊन कामाच्या सुधारित पूर्वगणनपत्रक रुपये 24 लाख 40 हजारांच्या कामास सर्वसाधारण सभेची कार्योत्तर मान्यता घेण्याचा विषय प्रशासनाकडून मंगळवारच्या सभेसमोर आला आहे.

मंद्रुप येथील पाटील विद्यालयाचे विद्यार्थी महापालिकेत
मंद्रुप येथील जे.डी. पाटील विद्यालयाच्या विद्यार्थ्यांनी मंगळवारी महापालिकेस भेट देऊन महापौर शोभा बनशेट्टी यांच्याशी वार्तालाप केला. महापालिकेचे सभागृह, प्रशासकीय इमारत, इंद्रभुवन इमारतीस विद्यार्थ्यांनी भेट देऊन पाहणी केली. महापौरांना विद्यार्थ्यांनी प्रश्‍न विचारून पालिकेचा कारभार कसा चालतो याबाबत माहिती घेतली. यावेळी महापौर शोभा बनशेट्टी यांनी विद्यार्थ्यांच्या प्रश्‍नाला समर्पक उत्तरे दिली. त्रिवेणी वनखेडे, दीपाली लोभे, चिदानंद कोळी, सागर वसेकर हे शिक्षक उपस्थित होते.