होमपेज › Solapur › सोलापूर-पुणे एसटीमध्ये महिलेचा विनयभंग

सोलापूर-पुणे एसटीमध्ये महिलेचा विनयभंग

Published On: Jul 21 2017 2:23AM | Last Updated: Jul 20 2017 9:55PM

बुकमार्क करा






सोलापूर : प्रतिनिधी

सोलापूर-पुणे जाणार्‍या एस. टी. बसमध्ये बसमधील लाईट बंद झाल्यानंतर   पुण्याला जाणार्‍या महिलेचा विनयभंग करणार्‍याविरुध्द फौजदार  चावडी  पोलिस  ठाण्यात गुन्हा दाखल करण्यात आला आहे.

एस. एस. टोणपे  असे गुन्हा दाखल झालेल्याचे  नाव आहे. याबाबत पुण्याला राहणार्‍या महिलेने फिर्याद दाखल केली आहे. यातील  पीडित महिला ही 13 जुलै रोजी मध्यरात्रीच्या सुमारास सोलापूर बसस्थानकातून सुटलेल्या सोलापूर-पुणे स्वारगेट बस क्र. एमएच 25 ई 0752 यामधून पुण्याकडे जात होती. पीडित महिला ही एसटीच्या कंडक्टरच्या शेजारीच बसली होती.  एस.टी. ही सोलापूरहून थोडी पुढे गेल्यानंतर बसच्या चालकाने बसमधील लाईट बंद केली. तेव्हा एस. एस. टोणपे या नावाच्या व्यक्तीने अंधाराचा फायदा घेऊन शेजारी बसलेल्या महिलेचा विनयभंग केला तसेच तू गप्प बस नाही तर तुला ठार मारीन, अशी धमकी दिली म्हणून फौजदार चावडी पोलिस ठाण्यात गुन्हा दाखल करण्यात आला आहे. सपोनि जमादार तपास करीत आहेत.

5 लाखांच्या फसवणूकप्रकरणी दोघांविरुध्द गुन्हा दाखल

जादा पैशाचे आमिष दाखवून 5 लाख रुपये घेऊन तरुणाची फसवणूक केल्याप्रकरणी दोघांविरुध्द सदर बझार पोलिस ठाण्यात गुन्हा दाखल करण्यात आला आहे. अजय शांतीकुमार गायकवाड (वय 39, रा. मोहितेनगर,) यांच्या फिर्यादीवरुन अमित श्रीकांत येळेगावकर आणि प्रवीण चंद्रकांत वाडे (रा. सोलापूर) यांच्याविरुध्द गुन्हा दाखल करण्यात आला आहे.

अमित येळेगावकर व प्रवीण वाडे या दोघांनी अजय गायकवाड यास जागेत पैशाची गुंतवणूक करुन जादा  फायदा करुन देतो असे सांगून गायकवाड याच्याकडून सात रस्ता जवळील इंडिया टी कॉर्नरजवळ 5 लाख  रुपयांचे तीन चेक घेऊन ते वाडे याच्या बँक ऑफ इंडियाच्या खात्यात जमा करुन ते वटवून पैसे घेतले. पैसे घेतल्यानंतर बर्‍याच दिवसानंतर आपल्याला पैसे मिळाले नाहीत म्हणून गायकवाड याने दोघांच्या मागे पैशाचा तगादा लावला. त्यावेळी दोघांनीही पैसे देण्यास टाळाटाळ करुन फसवणूक केली म्हणून सदर बझार पोलिस ठाण्यात दोघांविरुध्द फसवणुकीचा गुन्हा दाखल करण्यात आला आहे. हवालदार गायकवाड तपास करीत आहेत.