Fri, Nov 16, 2018 17:07



होमपेज › Solapur › मारिती चकरा.चकरा.. करती नखरा..नखरा...

मारिती चकरा.चकरा.. करती नखरा..नखरा...

Published On: Oct 01 2018 1:17AM | Last Updated: Oct 01 2018 1:17AM



टिपणी : संतोष आचलारे

सप्टेंबर महिना उलटला तरीही जिल्हाभरात अजूनही 50 टक्के पाऊस झाला नाही. खरीप पिकांच्या उत्पादनात शेतकर्‍यांना प्रचंड नुकसान होत असतानाच पावसाकरिता आकाशातून रोजच विमान घिरट्या घालीत असल्याचे दिसून येत आहे. या विमानाच्या घिरट्याने तरी पाऊस पडेल, अशी भोळी अपेक्षा बळीराजाला होती. मात्र पाऊसच पडत नसल्याने विमान मारती चकरा..चकरा.. करती नखरा..नखरा.. असाच सूर याबाबतत उमटत आहे. शेतकरी आकाशातील ढगापेक्षाही विमानाच्या घिरट्यांकडे लक्ष देत आहे. मात्र पाऊसच पडत नसल्याने विमानांच्या या घिरट्यांनी शेतकर्‍यांची मात्र चांगलीच फिरकी घेतली असल्याचे दिसून येत आहे. विमानाच्या घिरट्या या पाऊस पाडण्यासाठीच आहेत की नाही याबाबत अधिकृत खुलासा अजूनही सरकारी यंत्रणा करीत नाही. केवळ पावसाचा अभ्यास सुरु असल्याची माहिती सरकारी यंत्रणेकडून देण्यात येत असल्याने सरकारी यंत्रणा नेमकी कशामुळे विमानाच्या घिरट्या वाढवित आहे, असाच प्रश्‍न सर्वसामान्यांना पडला आहे. जिल्हा नियोजन समिती व जिल्हा परिषदेच्या सर्वसाधारण सभेत लोकप्रतिनिधींनी जिल्हा दुष्काळग्रस्त जाहीर करुन, शेतकर्‍यांना तातडीने नुकसान भरपाई देण्याची मागणी केली आहे. पालकमंत्री विजयकुमार देशमुख यांनीही दुष्काळी उपाययोजना करण्यासंदर्भात वरवरचे आदेश दिले आहेत. त्यामुळे ऑक्टोबर महिन्यापर्यंत तरी ठोस उपाययोजना होतील, अशी आशा शेतकर्‍यांना नाही. विभागीय आयुक्‍त डॉ. दीपक म्हैसेकर यांनी शुक्रवारी सोलापूर जिल्हा दौरा केला. त्यांच्याकडून तरी किमान दुष्काळी उपाययोजनेबाबत ठोस उपाययोजना करण्याचे आदेश होतील, अशी अपेक्षा होती. मात्र तीन आठवड्यात तहसीलदार, तालुका कृषी अधिकारी व गटविकास अधिकारी यांनी प्रत्येक तालुक्यातील दहा टक्के गावांची पाहणी करुन दुष्काळी अहवाल शासनाकडे सादर करावा इतकाचा दिलासा त्यांच्याकडून देण्यात आला. तोपर्यंत पाऊस पडला तर ठिकच आहे, मात्र खरीप पिकांच्या प्रचंड नुकसानीमुळे शेतकरी प्रचंड आर्थिक संकटात सापडला गेला आहे. अशा परिस्थितीत शेतकर्‍यांना किमान कर्ज रुपाने तरी मदत होण्याची तातडीने गरज निर्माण झाली आहे. पीक विमा योजनेत अनेक जाचक अटी असल्याने पीक विमा योजनेतून शेतकर्‍यांना कितपत नुकसान भरपाई मिळेल, याबाबत शंका उपस्थित होत आहे. ऑक्टोबर महिन्यात पीक कापणी प्रयोगाच्या अहवालावरुन पीक विमा मिळण्याची दिशा ठरणार आहे. खरीप हंगामात शेतकर्‍यांना पावसाअभावी प्रचंड फटका बसल्याने सर्व निकष व अटी व शर्ती बाजूला सारुन बळीराजाला खर्‍या अर्थाने उभारी देण्याची गरज आहे.