Sat, Nov 17, 2018 13:08



होमपेज › Satara › साताऱ्यात दमदार पाऊस (Video)

साताऱ्यात दमदार पाऊस (Video)

Published On: Sep 28 2018 3:36PM | Last Updated: Sep 28 2018 3:36PM



सातारा : प्रतिनिधी

सातारा शहराला शुक्रवारी दुपारी सुमारे अर्धा तास पावसाने अक्षरश: झोडपून काढले. सकाळपासून ऊन असताना अचानक दमधार पावसाने एंट्री केल्याने सातारकरांची त्रेधातिरपीट उडाली. गेल्या आठ दिवसांपासून उन्हामुळे लाही लाही होत असताना पाऊस झाल्याने एकीकडे दिलासा असला तरी शहराला स्वाईन फ्लूचा विळखा असतानाच पावसाने हजेरी लावल्‍याने नागरिकांच्या चिंतेत अधिक भर पडली आहे. 

शुक्रवारी दुपारी दोन वाजण्याच्या सुमारास पावसाला अचानक सुरुवात झाली. अचानक पावसाला सुरुवात झाल्यानंतर नागरिकांची पळापळ झाली. त्यातच मेघगर्जनेलाही सुरुवात झाल्याने वातावरणातील नूरच पालटला. पोवई नाक्यावर गे्रड सेपरेटरचे सुरु असलेले कामही यामुळे थांबले. 

पाऊस जोराचा असल्याने गटारीसह उंचावरुन येणार्‍या पाण्यामुळे रस्ते व परिसर जलमय झाला.  पाण्याच्या उतारामुळे रस्त्यावर घाणीचे लोटच्या लोट आले. यामुळे चारचाकींसह दुचाकी वाहन चालकांची चारी बाजूला कोंडीला झाली. शाळा, महाविद्यालय यामुळे पालकांसह विद्यार्थ्यांचीही खोळंबा झाला.