Sat, Nov 17, 2018 05:46



होमपेज › Satara › कोयना धरणात 29.88 टीएमसी पाणीसाठा 

कोयना धरणात 29.88 टीएमसी पाणीसाठा 

Published On: Jun 01 2018 2:14AM | Last Updated: Jun 01 2018 1:37AM



पाटण : गणेशचंद्र पिसाळ 

महाराष्ट्रासह कर्नाटक, आंध्रप्रदेश राज्यांसाठी महत्त्वपूर्ण ठरणार्‍या कोयना धरणाचे तांत्रिक वर्ष आता संपले. जुन्या वर्षाला निरोप व नव्या तांत्रिक वर्षाच्या सुरुवातीला धरणात सध्या तब्बल 29.88 टीएमसी पाणीसाठा शिल्लक आहे. गतवर्षीपेक्षा तब्बल अकरा टीएमसी ज्यादा पाणीसाठा शिल्लक असल्याने यानंतर जून, जुलै महिन्यात पावसाने दगाफटका केला तरीही हा साठा पुरेसा ठरणार आहे. चालूवर्षी अखंडित वीज व सिंचनासाठी महत्त्वपूर्ण व कायदा (लवाद) याची काटेकोरपणे अंमलबजावणी करत जलसंपदा व वीजनिर्मिती कंपनीच्या अधिकारी व कर्मचार्‍यांनी घेतलेले परिश्रम कौतुकास्पद ठरले आहेत . 

गतवर्षी 1 जूनला 19.08 टीएमसी पाण्यावर या धरणाचा तांत्रिक प्रवास सुरू झाला. चालू पावसाळ्यात येथे एकूण 126.09 टीएमसी पाण्याची आवक झाली. धरणाची साठवण क्षमता व आवक याचा मेळ घालण्यासाठी अतिवृष्टीच्या काळात येथून विनावापर 7.07 टीएमसी पाणी सोडून देण्यात आले. तर वर्षभरात पश्‍चिमेकडील वीजनिर्मितीसाठी 67.56,   सिचंनासाठी 29.70 पूरकाळात 2.48 असे एकूण 99.74 टीएमसीचा पाणीवापर होवून त्यातून 3207.214 दशलक्ष युनिट वीजनिर्मिती करण्यात आली आहे. तर ग्लोबल वॉर्मिंग व बाष्पीभवनामुळे 7.93 टीएमसीपाणी वाया गेले आहे. 

105 टीएमसी पाणीसाठवण क्षमता असणार्‍या या धरणातील पाण्यावर निम्म्याहून अधिक महाराष्ट्राची सिंचनाची व विजेची गरज भागवली जाते. याशिवाय पूर्वेकडील कर्नाटक, आंध्र प्रदेश राज्यातील सिंचनाची गरजही भागवली जाते. वर्षभरासाठी या धरणात असणार्‍या एकूण पाण्यापैकी पाणी वाटप लवादानुसार येथे वीजनिर्मिती व सिंचनासाठी लागणार्‍या पाण्याचे नियोजन केले जाते. पूर्वेकडील पोफळी, अलोरे, कोयना चौथा टप्पा या तीन टप्प्यातील 1920 मेगावॉट क्षमतेच्या वीजनिर्मिती प्रकल्पांसाठी वर्षभरासाठी 67.50 टीएमसी पाणी आरक्षित ठेवण्यात आले आहे. चालूवर्षी याचा काटेकोर व त्याचपटीत वापर झाला आहे. तर पूर्वेकडील सिंचनासाठी सोडण्यात येणार्‍या पाण्यावर धरण पायथा वीजगृहातून 40 मेगावॉट वीजनिर्मिती करून पुढे हे पाणी सोडण्यात येते. गत दोन वर्षांच्या तुलनेत चालूवर्षी सिंचनासाठी थोडा कमी पाणीवापर झाला आहे. यासाठी 29.70 टीएमसी पाणीवापर झाला आहे. 

एकूणच या तांत्रिक वर्षात अपेक्षित पाऊस झाल्याने अनेक प्रश्‍न आपोआपच मिटले होते. चालूवर्षीही वेळेत व सरासरी एवढा पाऊस पडेल अशा आशा हवामान खात्याने वर्तविल्या आहेत. याशिवाय वर्षारंभाला असणारा सध्याचा पाणीसाठा लक्षात घेता जून, जुलै महिन्यात पाण्याअभावी सिंचन अथवा वीजनिर्मितीला कोणतीही अडचण येणार नाही हे निश्‍चित. 

धरण व वीजनिर्मिती व्यवस्थापनाला सलाम
चालूवर्षी असणार्‍या पाण्याचे योग्य व काटेकोरपणे नियोजन करून अखंडित वीज व सिंचनासाठी मुबलक पाणी देताना जूनमध्ये शक्य तेवढे जास्तीत जास्त पाणी साठवून ठेवून जनतेला सार्वत्रिक दिलासा देणार्‍या जलसंपदा व वीजनिर्मिती कंपनीच्या अधिकारी ते सामान्य कर्मचारी या सर्वांच्याच कर्तृत्वाला सर्वच क्षेत्रांतून सलाम केला जात आहे.