होमपेज › Sangli › भाडेकरूंची माहिती न दिल्यास कारवाई

भाडेकरूंची माहिती न दिल्यास कारवाई

Published On: Dec 31 2018 1:45AM | Last Updated: Dec 30 2018 9:17PM




सांगली : प्रतिनिधी

घरमालकांनी त्यांच्याकडे असलेल्या भाडेकरूंची दि. 28 फेब्रुवारीपर्यंत माहिती द्यावी. ती न  देणार्‍यांवर कडक कारवाईचे आदेश जिल्हाधिकारी विजयकुमार काळम-पाटील यांनी दिले आहेत. शिवाय 30 डिसेंबर ते 28 फेब्रुवारीपर्यंत पूर्वपरवानगीशिवाय भाडेकरू ठेवण्यास बंदी आदेश लागू केला आहे. 

देशात अनेक ठिकाणी झालेल्या बॉम्बस्फोटांच्या घटनांमध्ये संशयित भाडेकरू म्हणून राहत असल्याचे स्पष्ट झाले आहे. सन  2015 मध्ये भाडेकरूंची माहिती न देणार्‍या घरमालकांवर कारवाई करण्यात आली होती. तरीही अद्याप काहींनी भाडेकरूंची माहिती पोलिसांकडे दिलेली नाही.  अनेक ठिकाणी झालेल्या बॉम्बस्फोटातील संशयित भाड्याच्या घरात रहात असल्याचे पोलिस तपासात स्पष्ट झाले आहे. शिवाय भाडेकरूंनी अनेक गंभीर गुन्हे केल्याचेही अनेकदा स्पष्ट झाले आहे. 

यापूर्वी जिल्ह्यातील घरमालकांना भाडेकरूची माहिती पोलिस ठाण्यात देण्यासाठी 2015 मध्ये मुदत दिली होती. त्यावेळी काहींनी माहिती न देणार्‍यांवर कारवाई करण्यात आली होती. घरमालकांना दिलेल्या सूचनांचे पालन केले जात नसल्याने जिल्ह्यात बंदी आदेश लागू करण्यात आला आहे. 

जिल्ह्यात कोठेही घर भाड्याने देताना भाडेकरूकडून ओळखपत्र तसेच मूळ पत्त्याचा पुरावा घेणे बंधनकारक करण्यात आले आहे. शिवाय भाडेकरूची स्वतंत्र नोंदवही ठेवल्याशिवाय घर भाड्याने देण्यास या आदेशाने मनाई करण्यात आली आहे.