Sun, Sep 23, 2018 12:35



होमपेज › Pune › निगडीपर्यंत मेट्रो पहिल्याच टप्प्यात

निगडीपर्यंत मेट्रो पहिल्याच टप्प्यात

Published On: Jan 20 2018 1:41AM | Last Updated: Jan 20 2018 12:31AM



पिंपरी : प्रतिनिधी

पुणे महामेट्रो निगडीपर्यंत नेण्यास केंद्र सरकारची संमती आहे. निगडीपर्यंत मेट्रो नेण्याबाबत राज्य सरकारने उचित निर्णय घ्यावा, असे पत्र केंद्रीय शहरी विकास राज्यमंत्री हरदीपसिंग पुरी यांनी राज्य सरकारला दिले आहे. हे पत्र त्यांनी खासदार श्रीरंग बारणे यांनादेखील पाठविले आहे. त्यामुळे पुणे मेट्रो पहिल्याच टप्प्यात निगडीपर्यंत नेण्याचा निर्णय राज्य सरकार घेऊ शकणार आहे. मुख्यमंत्री देवेंद्र फडणवीस यांची भेट घेऊन पुणे मेट्रो पहिल्याच टप्प्यात निगडीपर्यंत नेण्याची विनंती खासदार श्रीरंग बारणे यांनी केली आहे. 

पुणे मेट्रो पहिल्याच टप्प्यात निगडीपर्यंत नेण्याची मागणी  खासदार बारणे यांनी केंद्रीय शहरी विकासमंत्री हरदीपसिंग पुरी यांच्याकडे केली होती. त्यांनी महापालिका सर्वाधिक आर्थिक सहभाग उचलण्यास तयार असेल, तर पिंपरी ते निगडीपर्यंतच्या मेट्रो मार्गाला तत्काळ मंजुरी दिली जाईल, असे सांगितले होते.  

खासदार  बारणे म्हणाले की, केंद्र सरकारच्या वतीने पुणे महानगर क्षेत्रातील सार्वजनिक व्यवस्था सक्षम करण्याच्या दृष्टीने पिंपरी-चिंचवड महापालिका क्षेत्रातील मेट्रो रेल्वे कार्यान्वित करण्याचा निर्णय राज्य शासनाने पुणे मेट्रो रेल्वे प्रकल्पातील मार्ग क्र. 1 स्वारगेट ते पिंपरीला मान्यता दिली आहे. पहिल्या टप्प्यामध्येच निगडीतील भक्ती-शक्ती चौकापर्यंत मेट्रो सुरू व्हावी, ही पिंपरी-चिंचवडमधील नागरिकांची मागणी आहे. त्यानुसार निगडीपर्यंत मेट्रो नेण्याबाबत मी केंद्रीय शहरी विकास मंत्री हरदीपसिंग पुरी यांची भेट घेऊन निवेदन दिले होते. त्यांना पहिल्याच टप्प्यात निगडीपर्यंत मेट्रो नेण्याची विनंती केली होती. राज्य सरकारने उचित निर्णय घ्यावा, असे पत्र हरदीपसिंग पुरी यांनी राज्य सरकारला दिले आहे. त्यामुळे मेट्रो निगडीपर्यंत नेण्याबाबतचा निर्णय आता राज्य सरकारच्या कोर्टात आहे, असेही खा. बारणे म्हणाले.

मुख्यमंत्री देवेंद्र फडणवीस यांची भेट घेऊन पुणे मेट्रो पहिल्याच टप्प्यात निगडीपर्यंत नेण्याची विनंती केली आहे. पिंपरी-चिंचवड शहराची लोकसंख्या विचारात घेता; तसेच नागरिकांच्या मागणीचा विचार करून पिंपरी ते निगडीपर्यंतच्या मेट्रोच्या मार्गास राज्य सरकारने त्वरित मान्यता द्यावी. राज्य सरकारतर्फे आर्थिक मदत करून महामेट्रोला निगडीपर्यंतच्या मेट्रोचा डीपीआर त्वरित तयार करण्याचे आदेश द्यावेत, अशी विनंती मुख्यमंत्र्यांना केली आहे, असेही खा. बारणे यांनी सांगितले. 

मेट्रो पहिल्याच टप्प्यात निगडीपर्यंत नेण्याची शहरवासीयांची मागणी आहे. पिंपरीपर्यंत मेट्रोचे काम वेगात सुरू आहे. त्याला राज्य सरकारने मान्यता द्यावी. निगडीपर्यंत मेट्रो नेण्याबाबत आर्थिक सहकार्य करावे. काही आर्थिक भार पिंपरी-चिंचवड पालिका पेलेल. त्यामुळे पहिल्याच टप्प्यात मेट्रो निगडीपर्यंत नेण्यास कोणतीही अडचण येणार नाही. चालू कामात निगडीपर्यंतचे देखील काम मार्गी लागेल. त्यासाठी राज्य सरकारने सकारात्मक निर्णय घ्यावा, असे खा. बारणे यांनी सांगितले.