Tue, Sep 25, 2018 00:50



होमपेज › Pune › अकरा महिन्यांत ३८११ पुणेकरांना कोट्यवधींचा ऑनलाईन गंडा

अकरा महिन्यांत ३८११ पुणेकरांना कोट्यवधींचा ऑनलाईन गंडा

Published On: Dec 26 2017 1:33AM | Last Updated: Dec 25 2017 11:58PM

बुकमार्क करा





पुणे : पुष्कराज दांडेकर 

मोबाईलवर फोन करून एटीएम, डेबिट, क्रेडीट कार्डची माहिती घेऊन, कार्डची क्लोनिंग करून,कर्ज, नोकरी, व्यवसाय देण्याच्या अमिषाने तसेच लग्नाच्या अमिषाने मागील अकरा महिन्यांच्या कालावधीत तब्बल 3811 पुणेकरांना सायबर भामट्यांनी कोट्यवधींचा गंडा घातल्याची धक्कादायक स्थिती सध्या पुण्यात आहे. पुणे पोलिसांनी या प्रकरणांमध्ये आतापर्यंत फसवणूकीच्या प्रकरणांचा तपास करून 70 लाख 254 रुपयांचा रिफंड पुणेकरांना दिला आहे. पुढील वेगवेगळ्या मार्गांनी पुणेकरांना गंडा घातला जातोय ... 

-कार्डची माहिती घेऊन, क्लोनिंग करून फसवणूक 

पुणे देशातील मेट्रो सिटींपैकी एक आहे. शहरात आता प्रत्येकाकडेच एटीएम, डेबिट, क्रेडीट कार्ड आहे. पुणेकरच नव्हे तर देशभरातील नागरिकांना एटीएम, डेबिट, क्रेडीट कार्डच्या माध्यमातून आर्थिक व्यवहार करत आहेत. स्मार्टफोनमुळे सर्व व्यवहार सुकर झाले आहेत. मात्र खातेदाराला फोन येतो. समोरील व्यक्ती बँकेचा अधिकारी बोलत असल्याचे सांगूून कार्ड ब्लॉक होण्याची भिती दाखवतो अन कार्डची गोपनीय माहिती विचारून घेतो. अन क्षणार्धात खात्यातील पैसे गायब होतात. तसेच कार्डची क्लोनिंग करून बनावट कार्ड तयार करूनही रोकड गायब केली जाते. 

- नोकरी,विमा, कमी व्याजदराने कर्ज देण्याचे अमिष तसेच व्यवसाय 

फोन करून कमी व्याजदराने कर्ज देण्याचे किंवा नोकरी लावण्याचे अमिष दाखवले जाते. मात्र फोन करणारा भामटा कर्ज मंजूर करण्यासाठी वेगवेगळ्या कारणांनी पैशांची मागणी करतो. गरजू व्यक्ती कर्ज मिळविण्यासाठी ऑनलाईन रक्कम पाठवतो. त्यानंतर कर्जही मिळत नाही किंवा नोकरी मिळत नाही. बेरोजगार तरुण लवकर नोकरी मिण्याच्या किंवा व्यवसायासाठी कर्ज मिळण्याच्या आशेने बळी पडतात. तर विमा किंवा त्याची रक्कम देण्याच्या अमिषानेही पुणेकरांना जाळ्यात ओढून आर्थिक फसवणूक केली जाते. तर त्यासोबतच व्यवसाय सुरु करण्यासाठी किंवा भागीदार करून देण्याचे अमिष दाखवले जाते. त्यासाठी व्यक्तीकडून ऑनलाईन पैसे घेऊन व्यवसाय सुरु न करता फसवणूक केली जाते. 

- लॉटरी, मॅट्रीमोनियलच्या माध्यमातून 

मोबाईलवर लॉटरी लागल्याचा मेसेज पाठवून ते पैसे सोडवून घेण्यासाठी काही रकमेची मागणी करून फसवणूक केली जाते. मागील काही दिवसांपुर्वी एका ज्येष्ठ नागरिकाला अशा प्रकारे लाखो रुपयांना फसविण्यात आले. तर वेगवेगळ्या मॅट्रीमोनियल साईट्सवरून मैत्री करून लग्नाच्या अमिषाने भावनिकदृष्ट्या गुंतवले जाते. त्यानंतर वेगवेगळ्या कारणांनी पैसे उकळले जातात. 

फसवणूक टाळण्यासाठी हे करा 

- कोणतीही बँक एटीएम, डेबिट, क्रेडीट कार्डची गोपनीय माहिती विचारत नाही. त्यामुळे कोणालाही कार्डचा सोळा अंकी क्रमांक, सीसीव्ही क्रमांक किंवा पीन सांगू नका.
- कार्ड स्वाईप करताना स्वत:च्या नजरेसमोर स्वाईप करा. तसेच पीओएस मशीनचे निरीक्षण करूनच स्वाईप करा. 
- सुरक्षा रक्षक नसलेल्या किंवा गर्दी नसलेल्या एटीएम सेंटरमधून पैसे काढताना काळजी घ्या. मशीनला छुपा कॅमेरा, स्कीमर लावलेला नाही ना याची खात्री करा. 
- कमी व्याजदरात कर्ज देण्याचे अमिष दाखविल्यास त्याबाबत खात्री करूनच पुढील व्यवहार करा. 
- नोकरीचे अमिष दाखवले गेल्यास लगेचच पैसे न भरता खात्री करूनच पुढील प्रक्रीया करा. व्यवसायाबाबतही खात्री करूनच पैसे द्या. 

आकडेवारी 
वर्ष --  डेबिट,क्रेडीट कार्ड--क्लोनिंग-- लॉटरी--नोकरी--कर्ज-व्यवसाय-विमा फ्रॉड
2016-- 708---------  30-----14----   145-41--119----23
2017 --2945--------78------23------271-74--265---30
2017 ची आकडेवारी नोव्हेंबरपर्यंतची