Tue, Sep 25, 2018 02:41



होमपेज › Pune › महिलेच्या तोंडावर गुंगी येणारा स्प्रे मारून घर फोडले

महिलेच्या तोंडावर गुंगी येणारा स्प्रे मारून घर फोडले

Published On: Mar 15 2018 1:20AM | Last Updated: Mar 15 2018 12:28AM



पुणे : प्रतिनिधी

कोंढव्यात तीन चोरट्यांनी घरात घुसून एकट्या असणार्‍या महिलेच्या तोंडावर गुंगी येणार्‍या स्प्रे मारून बेशुद्ध करत घर फोडल्याचा खळबळजनक प्रकार समोर आला आहे. विशेष म्हणजे हा प्रकार मंगळवारी रात्री दहा वाजण्याच्या सुमारास घडला आहे. महिलेचे नातेवाईक रात्री उशीरा 1 वाजता घरी आल्यानंतर हा प्रकार समोर आला आहे. दरम्यान गंभीर घटनेनंतरही बुधवारी रात्रीपयर्र्ंत गुन्हा दाखल नसल्याची माहिती मिळाली आहे. या घटनेत महिला डोक्यावर पडल्याने जखमी झाली आहेत. घाबरल्या असल्याने त्या तक्रार देण्यास आल्या नसल्याची माहिती सूत्रांनी दिली. 

शहरातील घरफोड्या करणार्‍या चोरट्यांचा हैदोस काही केल्या थांबत नसून घरफोड्या करून पसार होत आहेत.  घर फोडीच्या घटनेनंतर कोंढवा परिसरात दहशतीचे वातावरण पसरले आहे. 

पोलिसांनी दिलेल्या माहितीनुसार, कोंढवा परिसरातील उंड्री पिसोळी येथे भूमी स्ट्रींग टाऊन सोसायटी आहे. या सोसायटीत 404 क्रमांकाच्या फ्लॅटमध्ये जखमी महिला राहतात. त्यांचे कुटुंबीय दोन दिवसांसाठी कामानिमित्त्त मुंबई येथे गेले होते. मंगळवारी रात्री दहा वाजण्याच्या सुमारास त्या एकट्याच घरी होत्या. त्यावेळी तीन अनोखळी व्यक्ती त्यांच्या घरात शिरले. 

त्यांनी जखमी महिलेच्या तोंडावर गुंगी येणार्‍या औषधाचा स्प्रे फवारला. त्यामुळे त्या बेशुद्ध होऊन खाली पडल्या. त्यानंतर तीन चोरटे घरातील सोन्याचे व चांदीचे दागिने चोरी करून पसार झाले. यामध्ये तक्रारदार यांच्या डोक्याला जखम झाली आहे. दरम्यान रात्री 1 वाजण्याच्या सुमारास मुंबई येथून त्यांचे कुटुंबीय परत घरी आले. त्यावेळी हा प्रकार समोर आला. त्यांनी तत्काळ त्यांना रुग्णालयात दाखल केले. तसेच पोलिसांना घटनेची माहिती दिली.

पोलिसांनी धाव घेतली. परंतु, घरातून नेमके काय गेले हे समजू शकले नाही. त्यानंतर पोलिस परत आले. बुधवारी सकाळी परत पोलिस सकाळी दहा वाजण्याच्या सुमारास त्यांच्या घरी गेले. मात्र, त्यावेळीही पोलिसांना याबाबत माहिती मिळाली. तसेच, दुपारी येऊन तक्रार देतो, असे सांगण्यात आले. त्यामुळे पोलिस परत आले. दुपारी कोणीच न आल्याने पुन्हा पोलिस महिलेच्या घरी गेले व चौकशी केली. 

त्यावेळी जखमी महिलेच्या नातेवाईकांनी घरातून नेमका किती माल गेला आहे, याबाबत माहिती घेऊन सांगतो असे सांगितले. तसेच, जखमी महिला या घाबरल्या असल्याने त्यांच्याकडेही पोलिसांना माहिती मिळाली नाही. त्यामुळे पोलिसांकडून बुधवारी रात्री उशीरापयर्र्ंत तरी गुन्हा दाखल करण्यात आला नव्हता. दरम्यान गंभीर प्रकार वरिष्ठ अधिकार्‍यांना कळविण्यात आला नसल्याचेही माहिती समोर आली आहे.