Fri, Jul 19, 2019 22:01



होमपेज › Nashik › पावसाचा जोर ओसरला; धरणसाठाही स्थिरावला

पावसाचा जोर ओसरला; धरणसाठाही स्थिरावला

Published On: Jul 11 2019 1:37AM | Last Updated: Jul 10 2019 11:28PM




नाशिक : प्रतिनिधी

पावसाचा जोर कमी झाल्याने गंगापूर धरणासह कश्यपी आणि गोदावरी-गौतमी धरणातील पाणीसाठाही आता स्थिरावला आहे. गंगापूर धरणात 2,299 दलघफू (40.83टक्के) पाणीसाठा झाला आहे. धरण क्षेत्रात पावसाचे प्रमाण दोन दिवसांपासून कमी झाल्याने पुन्हा चिंतेत भर पडली आहे. 

गेल्या रविवारी आणि सोमवारी नाशिक शहरासह त्र्यंबक व गंगापूर धरण समूहाच्या क्षेत्रात पावसाने मुसळधार हजेरी लावल्याने आठ टक्क्यांपर्यंत असलेला गंगापूर धरणाच्या पाण्याचा साठा दोनच दिवसांत 40 टक्के इतका झाला आहे. त्याचबरोबर जायकवाडी धरणासाठीदेखील पाणी सोडण्यात आले असून, गोदावरी नदीला आलेल्या पुरामुळे पाणी मराठवाड्याकडे पोचते झाले आहे. गंगापूर धरणात पाणीसाठा अद्यापही समाधानकारक नसल्याने शहराची पाणीकपात कायम ठेवण्यात आली आहे. धरणात 60 ते 70 टक्के पाणीसाठा झाल्यानंतरच आठवड्यातील दर गुरुवारी बंद ठेवण्यात आलेला पाणीपुरवठा सुरू करण्यात येणार असल्याचे महापौर रंजना भानसी व आयुक्‍त राधाकृष्ण गमे यांनी स्पष्ट केले आहे. तर दुसरीकडे काही नगरसेवक मात्र मतांचे राजकारण करण्यासाठी तसेच श्रेय मिळविण्यासाठी धरणात पुरेसा पाणीसाठा नसताना पाणीकपात रद्द करण्याचा हट्ट धरत आहेत. यामुळे अशा नगरसेवकांविषयी नाराजी व्यक्‍त केली जात आहे. महासभेतही त्याचेच पडसाद उमटले. माजी उपमहापौर तथा नगरसेवक गुरुमित बग्गा आणि राष्ट्रवादीचे गटनेते गजानन शेलार यांनी महासभेत पाणीकपातीविषयी चर्चा करण्याची मागणी केली. त्यावर महापौरांनी सदस्य नियुक्‍तीनंतरच चर्चा करण्याबाबत सांगितल्याने त्यावरून सदस्य व महापौर यांच्यात शाब्दिक चकमक झाली.