Mon, Jul 15, 2019 23:43



होमपेज › Nashik › निवडणुका झाल्यावर परत येईल!

निवडणुका झाल्यावर परत येईल!

Published On: Jul 15 2019 2:01AM | Last Updated: Jul 14 2019 10:49PM




नाशिक : प्रतिनिधी

राज्यात पाच वर्षांत लोकोपयोगी विविध कामे झाली आहेत. या कामांच्या जोरावर महाराष्ट्रात पुन्हा भाजपाचे सरकार स्थापन होईल. विधानसभा निवडणुका झाल्यानंतर मी परत येईल, अशा शब्दांत पालकमंत्री गिरीश महाजन यांनी जिल्हा नियोजन समितीच्या बैठकीतून आगामी निवडणुकांचे रणशिंग फुंकले. महाजन यांची ही खेळी उपस्थितांच्या नजरेतून सुटली नाही. 

जिल्हाधिकारी कार्यालयात रविवारी (दि.14) जिल्हा नियोजन बैठक पार पडली. आगामी विधानसभेपूर्वी ही अखेरची बैठक असल्याने त्यात अनेक महत्त्वपूर्ण निर्णय होतील, अशी अटकळ बांधली जात होती. प्रत्यक्षात मात्र, पालकमंत्री गिरीश महाजन यांनी पाच वर्षांतील राज्य सरकारची कामगिरी आणि जिल्ह्यातील विविध विषयांना हात घातला. 

देशातील पाच वर्षांतील कामांच्या जोरावर मतदारांनी नरेंद्र मोदी यांच्या नेतृत्वावर विश्‍वास व्यक्त करत केंद्रात स्पष्ट बहुमत दिले. राज्यातही देवेंद्र फडणवीस यांच्या मार्गदर्शनात विकासकामे केली आहेत. त्याच्या जोरावर महाराष्ट्रात पुन्हा भाजपाचे सरकार स्थापन होईल, असा विश्‍वास महाजन यांनी व्यक्त केला. दरम्यान, याचवेळी गेल्या पाच वर्षांत नाशिक व त्र्यंबकेश्‍वरमधील यशस्वीरीत्या पार पडलेला कुंभमेळा, दुष्काळ, गारपीट आदी विषयांना हात घातला. राज्यात 2014 साली भाजपाचे सरकार सत्तेत आल्यावर नाशिकमध्ये गारपिटीने द्राक्षबागा उद्ध्वस्त झाल्याची आठवण महाजन यांनी सांगितले. त्यावेळी द्राक्ष बागायतदार चिंतातुर झाले होते. त्यावेळी विधानसभेच्या पहिल्याच्या अधिवेशनाच्या काळात मुख्यमंत्र्यांना नाशिकमध्ये आणून द्राक्ष बागायतदारांचे नुकसान दाखविले होते. तसेच या नैसर्गिक संकटातून बाहेर काढण्यासाठी सरकार बागायतदारांच्या पाठीशी उभे राहिल्याचे त्यांनी सांगितले. 

नाशिक, पुणेनंतर राज्यात नाशिकचा क्रमांक लागतो. जिल्ह्यातील दुष्काळावर मात करण्यासाठी 33 कोटी वृक्षलागवडीअंतर्गत लोकसहभागातून अधिकाधिक रोपे लावण्याचे आवाहन त्यांनी केले. तसेच जलयुक्‍त शिवार आणि इतर सरकारी योजनांचा ऊहापोह त्यांनी भाषणात केला. महाजन यांनी त्यांच्या संपूर्ण भाषणात जिल्ह्याच्या विकासापेक्षा सरकारी योजनांवर अधिक भर असल्याचे दिसून आले. त्यामुळेच बैठक संपल्यानंतर ही बैठक नक्‍की जिल्ह्याच्या नियोजनाची होती की, आगामी विधानसभा निवडणुकीच्या तयारीची होती, अशी चर्चा उपस्थितांमध्ये रंगली.