Thu, Nov 15, 2018 12:15



होमपेज › Mumbai-Thane-Raigad › बदलापूरच्या ट्रेकरचा उत्तराखंडमध्ये मृत्यू

बदलापूरच्या ट्रेकरचा उत्तराखंडमध्ये मृत्यू

Published On: Jun 16 2018 3:34PM | Last Updated: Jun 16 2018 3:34PM



बदलापूर : प्रतिनिधी

बदलापूरच्या एका ट्रेकरचा उत्तराखंडमध्ये ट्रेकिंग करताना मृत्यू झाल्याची घटना घडली आहे. हर्षद आपटे या ट्रेकरचे नाव असून शुक्रवारी उत्तराखंडच्या बारा सुपा भागात ही घटना घडली.
हर्षद हा बदलापूरच्या पूर्व भागातील गांधी चौकात राहणारा होता. ७ जून रोजी हर्षद त्याच्या ११ जणांच्या टीमसोबत उत्तराखंडला ट्रेकिंगसाठी गेला होता, ज्यामध्ये ४ जण बदलापुरचे, तर इतर ७ जण उर्वरित महाराष्ट्रातले होते. २ परदेशी ट्रेकर्सही या ट्रेकमध्ये त्यांच्यासोबत होते. ९ तारखेला या सगळ्यांनी ट्रेकिंगची सुरुवात केली. १५ जून रोजी ते ट्रेक संपवून बेस कॅम्पकडे परतत होते. मात्र वाटेतला शेवटचा टप्पा असलेल्या बारा सुपा भागात आल्यावर अचानक हर्षदला श्वसनाचा त्रास जाणवू लागला. ऑक्सिजनची कमतरता आणि श्वसनाचा त्रास यामुळं अत्यवस्थ झालेल्या हर्षदला तातडीनं खाली आणण्यात आलं, मात्र तोवर त्याचा मृत्यू झाला होता. 

या घटनेची माहिती मिळताच हर्षदचे कुटुंबीय शुक्रवारी बदलापूरहून उत्तराखंडसाठी रवाना झाले असून ते उद्या उत्तराखंडला पोहोचतील. ३३ वर्षाचा हर्षद विवाहित असून त्याला ५ वर्षांची मुलगीही आहे. या अकस्मात घटनेमुळे त्याच्या कुटुंबियांवर दुःखाचा डोंगर कोसळला आहे. हर्षद हा पहिल्यांदाच हिमालयात ट्रेकिंगसाठी गेला होता. त्याला ट्रेकिंगचा छंद असल्याने महाराष्ट्रातील विविध गड-किल्ले यापूर्वी सर केल्याची माहिती त्याच्या मित्रांनी  दिली.