Sun, Sep 23, 2018 10:43



होमपेज › Mumbai-Thane-Raigad › सांगली-मिरज-कुपवाड व जळगाव पालिका निवडणुकीचे बिगुल वाजले

सांगली-मिरज-कुपवाड व जळगाव पालिका निवडणुकीचे बिगुल वाजले

Published On: Jun 25 2018 12:58PM | Last Updated: Jun 25 2018 2:16PM



सांगली/ मुंबई: पुढारी ऑनलाईन

सांगली-मिरज-कुपवाड व जळगाव महानगरपालिकेच्या सार्वत्रिक, तसेच वसई-विरार महानगरपालिकेच्या एका रिक्तपदासाठी 1 ऑगस्टला मतदान होणार आहे. तर मतमोजणी 3 ऑगस्ट रोजी होईल. त्यासाठी संबंधित क्षेत्रात आजपासून आचारसंहिता लागू झाली आहे, अशी घोषणा राज्य निवडणूक आयुक्त जे. एस. सहारिया यांनी सोमवारी केली.

सांगली-मिरज-कुपवाड महानगरपालिकेची मुदत 13 ऑगस्ट रोजी संपत आहे. शहराची एकूण लोकसंख्या 5 लाख 2 हजार 793 असून मतदारांची संख्या सुमारे 4 लाख 23 हजार 366 इतकी आहे. एकूण 20 प्रभागातील 78 जागांसाठी मतदान होईल. त्यापैकी महिलांसाठी 39 जागा राखीव आहेत. अनुसूचित जातीसाठी 11, अनुसूचित जमातीसाठी 1, तर नागरिकांच्या मागासप्रवर्गासाठी 21 जागा राखीव आहेत.

जळगाव महानगरपालिकेची मुदत 19 सप्टेंबर रोजी संपत आहे. शहराची एकूण लोकसंख्या 4 लाख 60 हजार 228 असून मतदारांची संख्या सुमारे 3 लाख 65 हजार 15 इतकी आहे. एकूण 19 प्रभागातील 75 जागांसाठी मतदान होईल. त्यापैकी महिलांसाठी 38 जागा राखीव आहेत.अनुसूचित जातीसाठी 5, अनुसूचित जमातीसाठी 4 , तर नागरिकांच्या मागासप्रवर्गासाठी 20 जागा राखीव आहेत, अशी माहिती त्यांनी दिली.

वसई-विरार महानगरपालिकेतील प्रभाग क्र. 97 च्या रिक्त पदासाठीदेखील 1 ऑगस्ट रोजी मतदान होईल. या सर्व ठिकाणी दि. 4 जुलै पासून उमेदवारी अर्ज दाखल करण्यास सुरुवात होईल, अशी माहिती सहारिया यांनी दिली.

निवडणूक कार्यक्रम 
उमेदवारी अर्ज दाखल करणे    : 4 ते 11 जुलै 
उमेदवारी अर्ज छाननी    : 12 जुलै 
उमेदवारी मागे घेणे    : 17 जुलै 
निवडणूक चिन्ह वाटप    : 18 जुलै 
मतदान    : 1 ऑगस्ट 
मतमोजणी    : 3 ऑगस्ट