Sun, Nov 18, 2018 08:07



होमपेज › Mumbai-Thane-Raigad › टाटा रुग्णालयात महिला डॉक्टरची आत्महत्या

टाटा रुग्णालयात महिला डॉक्टरची आत्महत्या

Published On: Jun 04 2018 1:31AM | Last Updated: Jun 04 2018 1:09AM



मुंबई : प्रतिनिधी

परळ येथील टाटा रुग्णालयात शनिवारी सायंकाळी साडेचारच्या सुमारास महिला प्रशिक्षणार्थी डॉक्टरने आत्महत्या केल्याची घटना उघडकीस आली. रुपाली कळकुंदरे (35) असे तिचे नाव असून, कामावर असताना इंजेक्शनद्वारे गुंगीच्या औषधांचा ओव्हरडोस घेत तिने आयुष्य संपविले.

भोईवाडा पोलिसांनी या प्रकरणी अपघाती मृत्यूची नोंद केली आहे. रुपाली  गेल्या दोन वर्षांपासून टाटा रुग्णालयाच्या भूलतज्ज्ञ विभागात कार्यरत होती. तिचा पतीही याच रुग्णालयात काम करत असल्याची माहिती रुग्णालय प्रशासनाने दिली.  ती गेल्या दोन वर्षांपासून नैराश्याच्या गर्तेत असल्याने तिच्यावर उपचार सुरू होते. याच नैराश्यातून शनिवारी सायंकाळी टाटा रुग्णालयाच्या सहाव्या मजल्यावरच्या विभागात काम करताना आत्महत्या केली. मात्र काही वेळात त्या विभागात पत्नीला भेटण्यास आलेल्या पतीच्या निदर्शनास ही बाब आली.

त्यानंतर त्वरित तिला रुग्णालयात दाखल करण्यात आले, मात्र उपचारादरम्यान तिचा मृत्यू झाल्याची माहिती रुग्णालय प्रशासनाने दिली. या नैराश्याचे नेमके कारण कळू शकले नाही, मात्र याच मानसिक ताणाला कंटाळून तिने हे पाऊल उचलल्याची प्राथमिक माहिती पोलीसांनी दिली. तिचा मृतदेह शनिवारी रात्री उशिरा कुटुंबीयांकडे सोपविण्यात आला. तसेच तिच्या मृतदेहाचे शवविच्छेदनही करण्यात आले आहे. मात्र शवविच्छेदनाच्या अहवालातून मृत्यूचे नेमके कारण समजेल, अशी माहिती रुग्णालय प्रशासनाने दिली. या प्रकरणी अधिक तपास सुरू असल्याची माहिती भोईवाडा पोलीस ठाण्याचे वरिष्ठ पोलीस निरीक्षक दत्तात्रय पाटील यांनी दिली.