Fri, Nov 16, 2018 21:36



होमपेज › Mumbai-Thane-Raigad › मराठा कार्यकर्त्यांवरील खटले मागे न घेतल्यास मंत्रालयाला घेराव

खटले मागे न घेतल्यास मंत्रालयाला घेराव

Published On: Oct 14 2018 1:47AM | Last Updated: Oct 14 2018 1:47AM



मुंबई : प्रतिनिधी

मुंबईसह राज्यातील काही भागात उसळलेल्या दंगलीत मराठा समाजातील ज्या कार्यकर्त्यांवर खटले दाखल करण्यात आले आहेत, ते दसर्‍यापूर्वी मागे न घेतल्यास येत्या 27 ऑक्टोबर रोजी मंत्रालयाला वाहनांसह घेराव घालण्यात येणार आहे. कोणाचीही मागणी नसताना सरकार स्वत:हून जर संभाजी भिडे यांच्यावरील खटले मागे घेत असेल, तर मग मराठा समाजावरच अन्याय का, असा सवाल उपस्थित करत मराठा क्रांती मोर्चाचे समन्वयक अंकुश कदम यांनी या आंदोलनाची घोषणा केली.

कदम म्हणाले की, सरकार समाजात दुही माजविण्याचे काम करत आहे. शिवस्मारकाची उंची कमी करून त्याचा खर्च 1 हजार 300 कोटी रुपयांनी कमी करण्यात आला आहे. तर आंबेडकर स्मारकासाठी राज्य गहाण ठेवण्याची तयारी असल्याचे सरकार जाहीर करते. सरकारमुळेच समाजातील वातावरण बिघडत आहे.

राज्यातील सर्व जिल्ह्यांतून या वाहन मोर्चाची तयारी सुरू असल्याचे सांगून ते म्हणाले की, जिल्ह्याजिल्ह्यांत बैठका सुरू आहेत. प्रत्येक जिल्ह्यातून दुचाकी व चारचाकी वाहने घेऊन कार्यकर्ते चेम्बूरला शिवरायांच्या पुतळ्याजवळ येतील. तेथे शिवप्रतिमेस वंदन करून ईस्टर्न एक्स्प्रेस वेने हा मोर्चा थेट मंत्रालयाला धडक देणार आहे. जोवर खटले काढून टाकले जात नाहीत, तोवर हा घेराव सुरू राहील, असेही कदम म्हणाले.

विद्यार्थी वसतिगृह, 50 टक्के फी सवलतीत मराठा समाजाची फसवणूक झाली असून, आता सरकारशी कोणत्याही प्रकारे चर्चा करणार नसल्याचेही सांगितले. यावेळी मनोहर वाडेकर, अ‍ॅड. अभिजित पाटील हेही उपस्थित होते.

डॉक्टर, वकील महिलांवरही खटले

डॉक्टर, वकील व पोलिस कर्मचार्‍यांच्या पत्नीवरही 307 कलमाखाली खटले दाखल करण्यात आले आहेत. ज्यांच्यावर असा खटला दाखल करण्यात आला आहे, त्या डॉ. कांचन पाटील म्हणाल्या की, आपण पेशाने डॉक्टर आहोत. आंदोलनात घोषणा दिल्या म्हणून आपल्यावर 307 कलमाखाली खटला दाखल केला आहे. असाच खटला अ‍ॅड. सुलक्षणा जगदाळे यांच्यावरही दाखल करण्यात आला आहे.