Wed, Nov 14, 2018 04:26



होमपेज › Mumbai-Thane-Raigad › एमआरआय मशीनजवळ अशा चुका करू नका !

एमआरआय मशीनजवळ अशा चुका करू नका !

Published On: Jan 30 2018 2:17AM | Last Updated: Jan 30 2018 1:31AM



मुंबई : पुढारी वृत्तसेवा

मुंबईतील नायर हॉस्पिटलमध्ये आपल्या नातेवाइकाला भेटण्यासाठी गेलेल्या राजेश मारू (वय 32) या तरुणाचा एमआरआय मशीमनध्ये खेचला जाऊन दुर्दैवी मृत्यू झाला. हा तरुण हातात सिलिंडर घेऊन एमआरआय रूममध्ये गेल्यानंतर मॅग्नेटिक पॉवरने मशीनकडे खेचला गेला. मशीनच्या मॅग्नेटिक फिल्डच्या कक्षेत आल्याने ही घटना घडली. मात्र मुंबईतील ही काही पहिलीच घटना नसून अशा अनेक घटना यापूर्वीही घडल्या आहेत. शिवाय अशीच घटना पूर्वी दिल्लीच्या आरएमएलमध्येही घडली होती, मात्र सुदैवाने त्यात जीवितहानी झाली नाही.

मुंबई व दिल्लीसह अशा प्रकारच्या दुर्घटना परदेशातही घडल्याची उदाहरणे सापडतात. 2001 मध्ये एमआरआय चेंबरमध्ये ऑक्सिजनचा सिलिंडर आणला गेल्याने तो मॅग्नेटिक फिल्डच्या संपर्कात आल्याने सिलिंडर 20 ते 30 फुटांवर तीव्र गतीने हवेत उडाला आणि एका 6 वर्षांच्या मुलाच्या डोक्यावर आदळल्याने त्या मुलाच्या डोक्याची कवटी फुटून त्याचा मृत्यू झाला. 

अशाच प्रकाची एक घटना एका महिलेसोबतही घडली. एमआरआय रूममध्ये जाण्यापूर्वी या रुग्ण महिलेने आपला हेअरपीन काढलेला नव्हता. मॅग्नेटिक फिल्डच्या संपर्कात आल्याने तो हेअरपीन महिलेच्या केसातून निघून नाकावाटे गळ्यात जाऊन रुतला. त्यानंतर महिलेचा जीव वाचवण्यासाठी शस्त्रक्रिया करावी लागली. 

2000 मध्ये न्यूयॉर्क शहरातही अशीच दुर्घटना घडली होती. एक पोलीस अधिकारी एमआरआय मशीनजवळ उभा होता. मॅग्नेटिक फिल्डच्या संपर्कात आल्यामुळे अधिकार्‍याची पिस्तूल त्याच्या हातातून सटकली आणि गोळी देखील झाडली गेली. सुदैवाची गोष्ट म्हणजे ही गोळी समोरच्या भिंतीला लागली आणि अनर्थ टळला. 

एमआरआय म्हणजेच मॅग्नेटिक रेझनन्स इमेजिंग. याला आपण मराठी भाषेत चुंबकीय अनुनाद प्रतिबिंबन देखील म्हणू शकतो. हे मेडिकल इमेजिंग तंत्र आहे. याद्वारे डॉक्टर शरीरातील अंगांचे फोटो मिळवतात. 

शरीराच्या आतील अंगांचे फोटो काढण्यासाठी ही मशीन अतिशय शक्तिशाली चुंबकीय क्षेत्र आणि रेडिओ तरंगांचा वापर करते. याच कारणामुळे धातूची कोणतीही वस्तू , मग ती सुई असो, किचनचा किंवा मग ऑक्सिजन सिलिंडर असो, अशा वस्तू चुंबकीय शक्तीमुळे त्वरित या मशीनकडे आकर्षित होतात. 

ही मशीन आपल्या आसपास इलेक्ट्रोमॅग्नेटिक फिल्ड तयार करते. यात पृथ्वीच्या गुरुत्वाकर्षणाच्या शक्तीपेक्षा 20 ते 40 हजारपट अधिक गतीने वस्तू आपल्याकडे खेचण्याची शक्ती असते. या मशीनचे मॅग्नेट कधीच बंद होत नाही. मशीनला जोडलेला कॉम्प्युटर जरी बंद पडला तरी मशीन मात्र काम करत राहते.