रत्नागिरी : प्रतिनिधी

बुधवारी सायंकाळपासून बेपत्ता असलेल्या प्रौढाचा गुरुवारी सकाळी कर्ला येथे खाडीत मृतदेह सापडला. नितीन प्रभाकर सावंत (वय 41, रा. ओंकार चैतन्य अपार्टमेंट नाचणे, ता. रत्नागिरी) असे मृत्यू झालेल्याचे नाव आहे. दरम्यान, नितीनची दुचाकी गुरुवारी सकाळी भाट्ये पुलावर मिळून आली होती.

 त्यावरून ही आत्महत्या असल्याचा प्राथमिक अंदाज वर्तवण्यात येत आहे.बुधवार 17 जानेवारीपासून नितीन घरी न परतल्यामुळे त्याची पत्नी अश्‍विनी हिने शहर पोलिसांना तो बेपत्ता झाल्याची खबर दिली होती. गुरुवारी सकाळी कर्ला येथील ग्रामस्थांना कर्ला खाडीत एक मृतदेह तरंगताना दिसून आला. त्यांनी तातडीने याची माहिती शहर पोलिसांना दिली. 

ही माहिती मिळताच पोलिसांनी घटनास्थळी धाव घेत मृतदेह पाण्यातून बाहेर काढून त्याचा पंचनामा केला. त्यानंतर उत्तरीय तपासणीसाठी रत्नागिरी जिल्हा शासकीय रुग्णालयात पाठवला. कर्ला खाडीत मृतदेह सापडल्याची माहिती नितीनच्या नातेवाईकांना समजताच त्यांनी जिल्हा रुग्णालयात धाव घेतली. तो मृतदेह नितीनचाच असल्याची ओळख पटविल्यानंतर मृतदेह नातेवाईकांच्या ताब्यात देण्यात आला. दरम्यान, नितीनची दुचाकी गुरुवारी सकाळी भाट्ये पुलावर मिळून आली होती. त्यावरून ही आत्महत्या असल्याचा प्राथमिक अंदाज वर्तवण्यात येत आहे. याबाबत अधिक तपास पोलिस हेड कॉन्स्टेबल बांगर करत आहेत.