Mon, Sep 24, 2018 03:22



होमपेज › Konkan › नेतृत्त्वगुणांमुळे टिळक लोकमान्य झाले

नेतृत्त्वगुणांमुळे टिळक लोकमान्य झाले

Published On: Jan 08 2018 1:14AM | Last Updated: Jan 07 2018 11:12PM

बुकमार्क करा




रत्नागिरी : प्रतिनिधी
महाराष्ट्रात दुष्काळ पडला आणि इंग्रजांनी अनन्वित अत्याचार सुरू केले. लोकमान्य टिळक यांनी शेतकर्‍यांना एकत्र केले. महाराष्ट्रात सर्वत्र रणयज्ञ सुरू करण्याचे आवाहन केले. पेण येथे 20 हजार शेतकर्‍यांनी मोर्चा काढला. इंग्रज अधिकार्‍याने शेतकर्‍यांना अटक करून तुरुंगात टाका, असे आदेश दिले. पण तेवढे तुरुंगच नव्हते म्हणून कैद्यांना पटांगणात ठेवण्यात आले. टिळकांना ही गोष्ट समजताच त्यांनी पेण गाठले. शेतसारा माफ करा, कामे बंद करा व सरकारी धान्यसाठा लोकांना खुला करा या मागण्या मान्य केल्या नाहीत तर तुम्ही इंग्रज येथून जिवंत तरी जाल का, असे म्हटल्यावर गोरा इंग्रज घाबरला आणि सर्व मागण्या मान्य केल्या. टिळकांच्या या नेतृत्वाने ते लोकमान्य झाले, असे प्रतिपादन राष्ट्रीय कीर्तनकार चारुदत्त आफळेबुवा यांनी केले.

कीर्तनसंध्या महोत्सवात चौथ्या दिवशी त्यांनी शेतकरी मोर्चा, टिळकांचे योगदान, चाफेकर बंधूंचा पराक्रम मांडला. पूर्वरंगात टिळकांच्या गीतारहस्यातील कर्मयोग समजावून सांगितला. बुवा म्हणाले की, चाफेकर बंधूंनी 300 युवकांची फळी तयार केली. चतुश्रुंगी गडावर लुटुपुटूच्या युद्धातून सराव केला. लाठीकाठी, बंदुका चालवल्या. दामोदर, बाळकृष्ण व वासुदेव चाफेकर या बंधूंसह महादेव रानडे यांनी जोर, बैठका व्यायामासह शरीर कमावले. मुंबईत व्हिक्टोरिया राणीच्या पुतळ्याला डांबरही फासले. आर्य धर्म प्रतिबंध निवारण  मंडळ स्थापन करून पुणे, मुंबईत हिंदू धर्माची निंदा  करणार्‍यांना अद्दल घडवली. त्यामुळे ख्रिश्चन धर्मात जाणारे हिंदू व धर्माची निंदा करणार्‍यांना वचक बसला. प्लेगच्या साथीमध्ये इंग्रज अधिकारी रँडने हिंदूंवर अत्याचार केले. त्यावेळी विठ्ठल मंदिरात शिवराज्याभिषेक दिनी चाफेकर यांनी या भारतभूमीमध्ये कुणी पुरुषच उरला नाही, हे गीत म्हटले. त्यावेळी लोकमान्य टिळकांनी त्यांना ‘दुसर्‍यांचे पौरुषत्त्व पाहण्यापेक्षा आपल्यात पौरुषत्त्व असते तर रँड  जिवंत राहिला नसता’ एवढाच उपदेश केला. त्यानंतर चाफेकरांनी प्रेरणा घेऊन कट रचला आणि व्हिक्टोरिया राणीच्या हिरक महोत्सवानिमित्त कलेक्टरच्या बंगल्यावरून घोडागाडीतून परत जाताना चाफेकर बंधूंनी रँडचा वध केला. भारतात इंग्रजी अधिकार्‍याला मारण्याची ही पहिलीच वेळ होती. त्यामुळे इंग्रज घाबरले. या घटनेने अनेक क्रांतीकारकांनी प्रेरणा घेतली.

बुवांनी कीर्तनात देह धारण असे ज्याने केला, आमुची माळियाची जात, कैवल्याच्या चांदण्याला, देव विठ्ठल, आम्ही दैवाचे शेतकरी, या भारतभूमीचे ठायी कुणी पुरुषच उरला नाह, अशी अनेक पदे सुरेख म्हटली. आफळे बुवांना अजिंक्य पोंक्षे याने गायनसाथ केली. तसेच राजू धाक्रस, उदय गोखले, मधुसूदन लेले, प्रथमेश तारळकर, सौ. आदिती चक्रदेव, महेश सरदेसाई यांनी साथसंगत केली. यावेळी गणपतीपुळे येथे समुद्रात बुडणार्‍यांचे जीव वाचवणारे जीवरक्षक सूरज पवार, राज देवरुखकर, योगेश पालकर, अमेय केदार, सचिन धामणसकर, रोहित चव्हाण, अनिकेत राजवाडकर, महेश वारेकर, मिथुन माने, हेमंत गावणकर, विश्‍वास सांबरे, संजय माने, अक्षय माने, उमेश म्हादे यांना आफळेबुवांनी सन्मानित केले. तसेच गोरक्षक मुकेश गुंदेचा यांचाही गौरव केला.

रत्नागिरी शहराला स्वच्छता सर्वेक्षणात ‘टॉप 20’ मध्ये क्रमांक मिळण्यासाठी स्वच्छता राखा, अशी सूचना आफळेबुवांनी केली. तसेच कोकण स्वच्छतेची राजधानी व पर्यटनाचे केंद्र व्हावे, याकरिता सदिच्छा व्यक्‍त केली. या कीर्तन  महोत्सवाला नगराध्यक्ष राहुल पंडित यांच्यासह सुमारे पाच हजार रसिक श्रोते उपस्थित होते. कीर्तन महोत्सवस्थळी 400 दुचाकी आणि 100 चारचाकी गाड्यांचे सुरेख पार्किंग करण्यासाठी कीर्तनसंध्या परिवाराचे सदस्य मेहनत घेत होते. त्यामुळे कोठेही वाहतुकीची कोंडी झाली नाही.