होमपेज › Konkan › मुंबई-गोवा महामार्ग धोकादायक!

मुंबई-गोवा महामार्ग धोकादायक!

Published On: Jun 11 2018 1:06AM | Last Updated: Jun 10 2018 10:22PM



कुडाळ : शहर वार्ताहर

चौपदरीकरण प्रगतीपथावर असलेला मुंबई- गोवा महामार्ग गेले दोन दिवस सुरू असलेल्या संततधार पावसामुळे वाहतुकीस अक्षरशः धोकादायक बनला आहे. चौपदरीकरण होत असलेला झाराप ते खारेपाटण टप्प्याची पुरती दुरवस्था झाली आहे. भरावाची माती महामार्गावर येऊन महामार्ग चिखलमय व निसरडा बनल्याने वाहतुकीस असुरक्षित बनला आहे. चौपदरीकरण ठेकेदार कंपनीने सुरक्षा मानांकनांचे खुलेआम उल्लंघन केल्याने ही स्थिती उद्भवल्याचा आरापे वाहनचालकांमधून होत आहे. दुसरीकडे वाहनचालक व प्रवाशांना जीव धोक्यात घालून प्रवास करावा लागत आहे. यात दुर्दैवाने एखादा अपघात घडल्यास त्याला जबाबदार कोण? असा सवाल उपस्थित होत आहे. 

सिंधुदुर्गात गेल्या चार दिवसांपासून पावसाचा जोर कायम आहे. रविवारीही मुसळधार पावसाचा जोर कायम होता. झाराप ते बिबवणे दरम्यान महामार्गाची पूर्णपणे दयनीय अवस्था झाली आहे. कुडाळ-पणदूर ते सिंधुदुर्गनगरी दरम्यान ठिकठिकाणी भरावाची माती वाहून आली आहे. तर डायव्हरशन मार्ग खड्डेमय वचिखलमय बनले आहेत

पावसाळ्यापूर्वी राष्ट्रीय महामार्ग विभाग व ठेकेदार दिलीप बिल्डकॉन कंपनीने सुरक्षित वाहतुकीच्या दृष्टीने आवश्यक उपाययोजना करणे अत्यावश्यक होते. मात्र, त्याकडे दुर्लक्ष झाल्याने पहिल्याच पावसात महामार्ग चिखलात सापडला आहे.  शनिवारी चक्‍क दिलीप बिल्डकॉन कंपनी प्रशासनाचीच बोलेरो गाडी चिखलात रूतली. ग्रामस्थांच्या मदतीने ही गाडी बाहेर काढण्यात आली. मोटारसायकलस्वारांसमोर तर या चिखलाने संकटच उभे राहिले आहे. पावशी-सीमावाडी दरम्यान महामार्गावरून पावसाचे पाणी उलटत असल्याने रस्त्यावर खड्ड्यांनी डोके वर काढण्यास सुरूवात केली आहे. तेथे या पाण्यामुळे मातीचा भरावही वाहून गेला आहे. महामार्गालगतचे मातीचे भराव पाण्याबरोबर वाहून जात असल्याने लगतच्या भातशेतीलाही धोका निर्माण होण्याची शक्यता आहे.

वेताळबांबर्डे येथे मोरी बांधण्यासाठी खोदण्यात आलेला रस्ता मातीने बुजविण्यात आला. मात्र, ती माती पावसात खाली बसून खड्डे पडून वाहनधारकांना त्रास सहन करावा लागत आहे. पणदूरतिठा येथे अणाव रस्त्याला जोडण्यात आलेला परिवर्तीत मार्ग रविवारी दुपारी अचानक मोरी बांधण्यासाठी खोदण्यात आला. परिणामी वाहतूक काही काळ खोळंबली.

ब्रीजची कामे अर्धवट

वेताळबांबर्डे नदीवरील ब्रीजचे काम जीव धोक्यात घालून ठेकेदार कंपनीचे कामगार करत आहेत. नदीच्या पाण्याचा प्रवाह सुरू होऊनही सध्या नदीवर उभारण्यात आलेल्या पिलरवर काम सुरू आहे.  

बसथांबे तोडल्याने प्रवाशांची गैरसोय

चौपदरीकरणासाठी  हायवेवरील सर्व बसथांबे व प्रवाशी शेड तोडण्यात आल्याने प्रवाशांची गैरसोय निर्माण होत आहे. बसच्या प्रतीक्षेत प्रवाशांना बसशेड अभावी पावसात भिजत उभे राहावे लागत आहे.