Tue, Nov 13, 2018 06:54



होमपेज › Kolhapur › महावितरणच्या मुख्य जनसंपर्क अधिकारीपदी पी.एस. पाटील

महावितरणच्या मुख्य जनसंपर्क अधिकारीपदी पी.एस. पाटील

Published On: May 02 2018 8:35PM | Last Updated: May 02 2018 8:35PM



 कोल्हापूर : प्रतिनिधी 

शाहूवाडी तालुक्यातील पिशवी येथील रहिवाशी असलेल्या  पी. एस. पाटील यांची महावितरणच्या मुख्य जनसंपर्क अधिकारी पदावर पदोन्नतीने नुकतीच निवड झाली आहे. महावितरण व्यवस्थापन आणि प्रसार माध्यमे, ग्राहक व इतर घटकांमध्ये उत्तम समन्वय साधून काम करणारे तसेच दांडगा जनसंपर्क असणारे अधिकारी म्हणून त्यांचा नावलौकिक आहे. या पूर्वी ते सहमुख्य जनसंपर्क अधिकारी-(ख) या पदावर कार्यरत होते.

1992 साली सरळ सेवेतून त्यांची तत्कालीन महाराष्ट्र राज्य विद्युत मंडळात जनसंपर्क अधिकारी म्हणून निवड झाली. त्यानंतर उपमुख्य जनसंपर्क अधिकारी, सहमुख्य जनसंपर्क अधिकारी-(ख) या पदांसह  शिष्टाचार अधिकारी या पदाची धुरा त्यांनी मागील अनेक वर्षापासून यशस्वीरित्या सांभाळली आहे.  पी.एस. पाटील यांच्या नेतृत्वात महावितरणच्या जनसंपर्क विभागाने अधिक भरीव कामगिरी करत जनसंपर्क विभागाला नवे आयाम मिळवून दिले आहे. पाटील यांच्या कामातील तत्परता, मनमिळावू स्वभाववृत्तीमुळे जनसंपर्क विभाग यशस्वी कामगिरी करत असून त्यातून उत्तम समन्वय, चांगली प्रतिमा निर्मिती व ग्राहकांचा पाठिंबा मिळविण्यात, प्रभावी जनमत घडवून ग्राहक जागृती करण्यात महावितरणला यश मिळाले आहे. या कामाची दखल घेत महावितरण व्यवस्थापनाने पदोन्नतीने त्यांची मुख्य जनसंपर्क अधिकारीपदी निवड केली आहे.

महावितरणमध्ये रूजू होण्यापूर्वी त्यांनी कोल्हापूर येथून दैनिक पुढारीसाठी पत्रकार म्हणून काम केले आहे. शैक्षणिक, सामाजिक आणि विविध सामाजिक संस्थेत ते सक्रियपणे कार्यरत आहेत. राज्याच्या सहकार क्षेत्रात भरीव योगदान देणारे दिवंगत खासदार उदयसिंगराव गायकवाड यांची प्रेरणा व आदर्श यामुळेच आपण या पदापर्यंत पोहचलो असे पी.एस. पाटील यांचे कृतज्ञतापूर्वक म्हणणे आहे. पाटील यांच्यापूर्वी या पदावर  राम दोतोंडे कार्यरत होते.