Mon, Nov 19, 2018 12:34



होमपेज › Kolhapur › वैद्यकीय कचरा सामान्यांच्या जीवावर

वैद्यकीय कचरा सामान्यांच्या जीवावर

Published On: Jan 12 2018 1:52AM | Last Updated: Jan 11 2018 11:58PM

बुकमार्क करा




निपाणी : प्रतिनिधी 

प्रगत औषधौपचार योग्य असला तरी यातला वैद्यकीय कचरा मानवी जीवाला धोकादायक ठरत आहे. शहरातला हा कचरा उचलला जात असला तरी ग्रामीण भागात त्याची  रस्त्यावर उघड्यावरच विल्हेवाट लावली जाते. हा कचरा ग्रामीण  लोकांच्या जीवावर बेतत आहे.

निपाणी  परिसरात लहान-मोठे दवाखाने आहेत. रुग्णांसाठी वापरण्यात आलेली वैद्यकीय उपकरणे ठराविक दवाखान्यातून ती वैद्यकीय प्रकल्पाला देऊन आपला परिसर स्वच्छ ठेवला जातो; पण ग्रामीण भागात वैद्यकीय कचरा गावाजवळील रिकाम्या जागेवर अथवा ओढे, नाले, वगळीमध्ये टाकला जातो. ग्रामीण नागरिकांना वैद्यकीय कचर्‍याबाबत जागृती आणि माहिती नसल्याने त्याचा योग्य तो विचार न होता त्याचा गैरवापरही होतो.

दवाखान्यात वापरण्यात आलेल्या सिरिंज, बाटल्या, इंजेक्शन, ट्यूब, सलाईन, पाईप यासह अन्य कचरा उघड्यावरच टाकला जातो. यामध्ये मुले वरील काही साधनांचा खेळण्यासाठी वापर करीत असतात. यातून अनेक अपायकारक घटना घडू शकतात.

ग्रामीण भागातील सरकारी अथवा खासगी दवाखान्यामध्ये प्रसूतीनंतर टाकावू अवयव व अन्य साहित्य उघड्यावरच टाकले जाते. त्यामुळे काही भागात दवाखान्याच्या परिसरात दुर्गंधीचा त्रास होऊ शकतो. वैद्यकीय कचर्‍याची अशीच समस्या राहिल्यास नागरिकांचे आरोग्य धोक्यात येऊन शकते.

दोन  वर्षापासून देशपातळीवर स्वच्छता मोहिमेचा उपक्रम शासनाने सुरू केला आहे. यानिमित्ताने राजकीय नेते, समाजसेवी संस्था उपक्रमात सहभागी झाल्या आहेत; पण वैद्यकीय कचर्‍याचा प्रश्‍न तसाच आहे. या मोहिमेंतर्गत वैद्यकीय कचराही उचलण्याची जबाबदारी घेतल्यास हा प्रश्‍न निकालात निघेल.

शहरातून महिन्याला एक टन कचरा...

निपाणीत 40 हून अधिक लहान-मोठी रुग्णालये आहेत. येथून प्रत्येकाकडे 500 ते 1 हजार गॅ्रमपर्यंत वेगवेगळा वैद्यकीय कचरा जमा होतो. यामुळे महिन्याला शहरातून बायोमेडिकल म्हणून सुमारे एक टन निघणारा वैद्यकीय घनकचरा सौंदत्ती तालुक्यात बेळगाव पर्यावरण व्यवस्थापन या आरोग्य खात्याशी संलग्न असलेल्या हारुगोपा या संस्थेकडे विघटनासाठी पाठविला जातो. यासाठी सभासदांकडून महिन्याला 2 ते 4 हजार रु. इतकी फी आकारली जाते. शहरातील एमबीबीएस डॉक्टर वगळता इतर डॉक्टरांकडून दैनंदिन कचर्‍याबाबत योग्य खबरदारी घेतली जात नाही. रुग्णालयातून दररोज निघणार्‍या कचर्‍याचे  ब्लू, यलो आणि रेड अशा पिशव्यांमध्ये वर्गीकरण केले जाते.