Wed, Sep 26, 2018 14:57



होमपेज › Kolhapur › विजेच्या कडकडाटांसह जोरदार पाऊस

विजेच्या कडकडाटांसह जोरदार पाऊस

Published On: Jun 02 2018 2:01AM | Last Updated: Jun 02 2018 1:47AM



कोल्हापूर : प्रतिनिधी

विजेच्या कडकडाटांसह शहरासह ग्रामीण भागात शुक्रवारी रात्री साडेसातच्या सुमारास जोरदार पाऊस पडला. सुमारे तासभर पाऊस सुरू होता. पावसामुळे शहराच्या सखल भागात पाणी साचले तर काही ठिकाणी वीजपुरवठा बंद झाल्याने अंधाराचे साम्राज्य पसरले. रात्री उशिरापर्यंत पावसाची रिमझीम सुरूच होती.

मागील अनेक दिवसांपासून उकाडा वाढला होता. आज सकाळी नऊ वाजल्यापासून उन्हाचा तडाखा जाणवत होता. दुपारी बारानंतर तर  उष्म्याने शहरवासीयांच्या अंगाची लाहीलाही होत होती. उकाड्याने घामाघुम झालेली मंडळी थंडाव्यासाठी ताक, लस्सी, थंड पेये पिण्यासाठी दुकानांमध्ये गर्दी करत असल्याचे चित्र होते. सायंकाळी साडेपाचनंतर मात्र अचानक वातावरण बदलू लागले. विजांचा कडकडाट सुरू झाला. बराच वेळ विजांचा कडकडाट सुरू होता. 

रात्री साडेसातच्या  सुमारास पावसास सुरुवात झाली. जोरदार पाऊस पडू लागला. पाऊस सुरू झाल्याने रस्त्यावरील पादचारी व दुचाकीस्वारांनी झाडाखाली तसेच दुकांनांमध्ये आसरा शोधण्याचा प्रयत्न केला. पाऊस बराच वेळ सुरू होता. त्यामुळे रस्त्यावरील वाहतूक एकदम कमी झाली. तासाभरानंतर पावसाचा जोर ओसरला. यानंतर उशिरापर्यंत रिमझीम पाऊस सुरू झाला.  अचानक पाऊस पडल्याने कामे आटोपूृन घरी परतणार्‍या नागरिकांची अडचण झाल्याचे दिसून आले. एस.टी. स्टँडवरील प्रवाशांचीही पावसामुळे तारांबळ उडाल्याचे दिसून आले. 

शेतकर्‍यांतून समाधानबाजारभोगाव  वार्ताहर       
बाजारभोगावसह परिसरात शुक्रवारी रात्री  साडेआठ वाजता  विजेच्या गडगडासह वळीव  पाऊस झाला. या पावसामुळे मशागतीच्या कामास वेग येणार असल्याने बळीराजातून समाधान व्यक्त होत आहे.
    मागील तीन-चार  दिवसांपासून परिसरात  ढगाळ वातावरण होते पण पाऊस पडत नव्हता तसेच शुक्रवारी दिवसभर उकाडा जाणवत होता. सायंकाळी आकाशात ढगाची गर्दी दिसत होती रात्री साडेआठ च्या सुमारास विजेच्या गडगडासह पावसाला सुरुवात झाली. सुमारे तासभर हा पाऊस झाला असून  पेरणीसह मशागत करण्यासाठी व उभी पिके यांना उपयुक्त पाऊस झाल्याने शेतकरी वर्ग समाधानी झाला.