Wed, May 22, 2019 14:56



होमपेज › Goa › २४ तास पाणीपुरवठ्याची येत्या ३ वर्षांत स्वप्नपूर्ती

२४ तास पाणीपुरवठ्याची येत्या ३ वर्षांत स्वप्नपूर्ती

Published On: Dec 11 2018 1:39AM | Last Updated: Dec 11 2018 12:17AM




पणजी : प्रतिनिधी

राज्यातील पाणीपुरवठा, सॅनिटेशन आणि मलनिस्सारण योजनेत सुधारणा करण्यासाठी पोर्तुगालच्या ‘आगास द पोर्तुगाल’ संस्थेशी तीन वर्षांसाठी सामंजस्य करार करण्यात आला आहे. या योजनेंतर्गत साळावली आणि ओपा प्रकल्पातून होणार्‍या  पाणीपुरवठ्यात  सुधारणा केली जाणार आहे. या करारामुळे  येत्या 3 वर्षांत राज्यात 24  तास पाणीपुरवठ्याची स्वप्नपूर्ती होणार आहे, असे सार्वजनिक बांधकाममंत्री सुदिन ढवळीकर यांनी सांगितले. 

ढवळीकर यांच्या नेतृत्वाखाली खात्याच्या वरिष्ठ अधिकार्‍यांनी नुकताच  पोर्तुगालचा दौरा केला. या दौर्‍याची माहिती देताना ढवळीकर म्हणाले, की साळावली जलाशयातून  पावसाळ्यात खनिजमिश्रित पाण्याचा पुरवठा होण्याची समस्या आहे. ही समस्या दूर करण्यासाठी उपाययोजना हाती घेतली जाणार आहे. ओपा  जलशुद्धीकरण प्रकल्पाची क्षमता वाढवली जाणार असून पुढील दोन महिन्यांत फोंडा आणि तिसवाडी तालुक्याच्या पाणीपुरवठ्यात सुधारणा केली  जाणार आहे. राज्यातील महत्त्वाच्या शहरात आणि किनारी भागात मलनिस्सारण प्रकल्प भर वस्तीत उभारण्यात येणार असून नव्या आधुनिक तंत्रज्ञानामुळे लोकांना या प्रकल्पापासून कसलाही त्रास होणार नाही, याची काळजी घेतली जाणार आहे. 

राज्यातील जनतेची 400 एमएलडी पाण्याची गरज असून राज्यात 620 एमएलडी फिल्टर्ड पाण्याचे उत्पादन होते. मात्र, राज्यातील पाणीपुरवठ्यात मागील अनेक वर्षे 30 ते 40 टक्के पाण्याची नासाडी, गळती अथवा होणार्‍या चोरीमुळे खात्याला नुकसान होत आहे. राज्यातील जुन्या जलवाहिन्या बदलून सर्वत्र ‘स्काडा’ मीटर बसवून हेनुकसान 15 ते 20 टक्क्यापर्यंत खाली आणण्याचा खात्याचा प्रयत्न आहे. पोर्तुगालमध्ये सर्वत्र स्टेनलेस स्टीलच्या वाहिन्या असून राज्यातही जुन्या वाहिन्या बदलण्याचे काम हाती घेतले गेले आहे. पणजी, वास्को, मडगाव, म्हापसा, डिचोली, कुडचडे आदी महत्वाच्या शहरात  पाण्याच्या नासाडीचे प्रमाण सरासरी 30 टक्क्यांपर्यंत खाली आणले असले तरी अजूनही काही शहरात मोठ्या प्रमाणात पाण्याची नासाडी होत असल्याचे ढवळीकर यांनी सांगितले. 

पोर्तुगालसंबंधी विधानावर ठाम : ढवळीकर

आपण पोर्तुगालच्या दौर्‍यावर गेलो म्हणून राज्यात अनेकांनी  टीका केली असली तरी आपण भारत सरकारचा प्रतिनिधी म्हणून गेलो होतो, असे सार्वजनिक बांधकाम मंत्री सुदिन ढवळीकर यांनी सांगितले. ते म्हणाले, पोर्तुगालने पाणी पुरवठा आणि मलनिस्सारण क्षेत्रात प्रगती केली असून त्याची प्रत्यक्ष पाहणी करण्यासाठी आपण पोर्तुगालला भेट दिली होती. मात्र, पोर्तुगीजांनी गोवा सोडताना नाहक साधनसुविधा, रस्ते, पूल आणि जलवाहिन्या नष्ट केल्या होत्या, या विधानावर आपण ठाम आहोत. यासाठी पोर्तुगालने गोमंतकीयांची माफी मागण्याची गरज आहे, असे आजही  आपले मत  कायम आहे. मात्र, पोर्तुगालच्या भेटीमुळे गोव्याला आणि स्थानिकांना चांगले तत्रंज्ञान मिळणार असल्याने त्यांची मदत घेणे चुकीचे नाही, असे आपल्याला वाटते, असेही ते म्हणाले.