होमपेज › Belgaon › पतसंस्थेवर वीस लाखांचा दरोडा

पतसंस्थेवर वीस लाखांचा दरोडा

Published On: Jul 28 2018 1:32AM | Last Updated: Jul 28 2018 12:17AM



चिकोडी : प्रतिनिधी

पतसंस्थेच्या शटरचे कुलूप तोडून प्रवेश करीत लॉकरमधील रोख 10 लाख 67 हजार  रुपयांसह  9  लाख 48 हजार किमतीचे 30 तोळे दागिने  सोन्याचे दागिने असा सुमारे 20  लाखांचा ऐवज चोरट्यांनी लंपास केल्याची घटना आज तालुक्यातील बेळकूड येथे घडली आहे.

माहिती मिळताच अतिरिक्त जिल्हा पोलिसप्रमुख रवींद्र गडादे यांच्यासह पोलिस अधिकार्‍यांनी श्‍वानपथक व ठसेतज्ज्ञांना पाचारण करण्यात आले, पण चोरट्यांचा माग लागला नाही. बेळकूड येथील  सिद्धेश्‍वर अर्बन  क्रेडिट सौहार्द सोसायटीच्या शटरचे कुलूप पारीने तोडून अज्ञातांनी चोरी केल्याची घटना आज सकाळी उघडकीस आली. चिकोडी पोलिसांना   कळविल्यानंतर पीएसआय संगमेश होसमनी घटनास्थळी दाखल झाले.

संस्थेच्या लॉकरमध्ये ठेवण्यात आलेले रोख 10 लाख, 67 हजार,  31 रकमेसह 30 तोळे सोन्याचे दागिने  लंपास केल्याचे उघडकीस आले. ही घटना गुरुवारी सायंकाळी 9 ते शुक्रवारी सकाळी 7 च्या दरम्यान घडल्याचे पोलिसांनी सांगितले. 

चिकोडी शहरासह तालुक्यात मागील वर्षभरात घरफोडी, दुकाने फोडीसह अनेक चोरीच्या घटना घडल्या आहेत. यात किरकोळ मुद्देमाल चोरीला गेला होता, पण मोठ्या प्रमाणात रोख रक्कम व सोन्याचे दागिने लंपास केल्याची घटना तालुक्यातील पहिलीच घटना असल्याचे पोलिसांनी सांगितले. 

याप्रकरणी संस्थेचे संचालक तुकाराम संतराम मोरे यांनी चिकोडी पोलिसात फिर्याद दाखल केली आहे. घटनास्थळी अतिरिक्त जिल्हा पोलिस प्रमुख रवींद्र गडादे, पोलिस उपाधिक्षक दयानंद पवार, सीपीआय मल्लनगौडा नायकर हे दाखल झाले. बेळगांवहून श्‍वान पथक, ठसेतज्ज्ञांना पाचारण करण्यात आले. यावेळी श्‍वान कांही अंतरावर घुटमळल्याने चोरट्यांनी गाडीने पसार झाल्याचे पोलिसांनी सांगीतले.